Deputadu Bankada CNRT, Domingos de Carvalho hatete, dadauk Ró Berlin Ramelau nia kondisaun foun no kapas maibé ekipamentu atu proteje pasajeiru sira laiha.
"Ekipamentu iha laran ne'e, la sufisiénte, e sala boot ida ba ita-nia pasajeiru sira atu tur kadeira sira ne'e. Iha ne'ebá ne'e ita tama iha laran ne'e manas", dehan nia iha plenária PN, tersa (11/01).
Ho ida ne'e, husu atu monta netik AC (air conditioner) ruma iha laran, rua husi sorin, no rua husi sorin, atu proteje nafatin pasajeiru sira.
Deputada Bankada FRETILIN, Noemia Siqueira husu ministru transporte no komunikasaun atu haree asuntu Ró Berlin Ramelau nian, tanba preparasaun iha karan ladun di'ak, hanesan kafetária, hahán, laiha atu sustenta pasajeiru sira halo viajen kalan ida tomak.
"Ne'e mak husu ba Ministériu Transporte no Komunikasaun, atu kria kondisaun ne'ebe mak di'ak para ró ne'e bele fasilita ita-nia populasaun ba tempu naruk nian", dehan nia.
Nune'e mós fatin lixu iha ró laran, tau fali iha leten, maibé iha fatin pasajeiru ninian ne'e la tau, ida ne'e kestionavel tanba ró ne'e nia kondisaun foun mak buat hotu hahú la'o rungu ranga hanesan ne'e ladun di’ak. (*)