Deputada Bankada FRETILIN, Nélia Menezes hatete, nia parte agradese ba prezensa Xanana Gusmão tanba apoiu normaliza Ponte iha Bekussi Sentru, Suku Bekora, Postu Administrativu Kristu-Rei, Munisípiu Dili.
"Ha’u hakarak ko’alia kona-ba Ponte Bekussi, iha Igreja Bekora nia kotuk, hahú atu agradese ba prezensa Avo Nana nian iha Bairo Bekussi Sentru ne’ebé fó ajudu hodi konvida kompaña ida hodi bele hadi'a fundasi ponte nian no normaliza mota Bekussi igreja kotuk, agradese ba apoiu ida ne'e ba Avo Nana”, dehan Deputada Nélia iha plenária Parlamentu Nasionál, segunda (10/01).
Bankada FRETILIN mós agradese ba parte Governu, liuhusi Institutu Jestaun no Ekipamentu (IJE), ne'ebe fó resposta rápidu hodi tun ba haree no halo levantamentu ba dadus, depois Xanana bolu kompaña ba hadi'a ponte refere.
"Ami agradese tanba bele ajuda ami-nia komunidade Bekussi para transporte bele la'o filafali”, hatete nia.
Ho ida ne'e husu ba Ministériu Obras Públika, tanba kestaun ida ne'e deputada levanta antes ona kona-ba ponte rua iha Bekussi Sentru.
Tanba iha Bekussi Sentru ne'e Ponte rua, ida iha igreja Bekora nia kotuk, ida fali mak ponte Bee-Anin, iha tempu liubá, bainhira udan tun, mota mai ne'e, nia volume bee ne'e fahe ba ponte rua ne'e hotu.
Maibé to'o ikus ne'e mota ne'e nia volume hahú sae maka’as liu ba Ponte bee-anin nian entaun husu para obras públiku hamutuk ho autoridade lokál atu haree oinsá normaliza filafali bee dalan sira ne'e. (*)