"Entaun ita hanoin katak sé de'it mak prezidente, karik kuadru PD nian ne'ebé sai kandidatu ita presiza apoiu husi maun sira hothotu maun Xanana, maun Mari, maun Taur, líder hothotu no partidu polítiku hothotu, inan-aman hothotu só ida ne'e mak rezulta ba prezidente ida ne'ebé di'ak ba povu tomak", deklara Prezidente Partidu Demokrátiku (PD), Mariano ‘Assanami’ Sabino, hafoin hasoru malu ho Prezidente Repúblika, Francisco Guterres ‘Lú Olo’, iha Palasíu Prezidensiál Bairopite, kinta (06/12).

Kandidatu PD nian iha, mais kadidatu ba povu nian nu'udar jerasaun foun, partidu PD sei husu apoiu husi partidu ka líder hothotu.

Nune'e mós sei halibur no rona opinaun husi kuadru no militante husi munisípiu hotu atu iha konferénsia nível nasionál ne'ebé hodi foti desizaun.

"Hanoin karik abanbairua kandidatu PD nian iha, mais ne'e kuadru PD nian, mais kandidatu tenke sai povu nian e sempre nu'udar jerasaun foun ami sempre husu apoiu partidu hothtou, líder hothotu, tanba PreZidente Repúblika ne'e diferente nia funsaun iha sistema semi-presidensialista, nia la'ós atu hala'o servisu iha partidu polítiku nian, la'ós intrese partidu nian, maibé garantia funsionamentu instituisionál e depois garantia sistema demokrátiku ne'ebé la'o", esplika nia.

Maibé kona-ba data eleisaun Prezidensiál nian hothotu kumpri de'it saida mak prezidente deside, tanba prezidente mós deside tuir kompeténsia ne'ebé mak konstituisaun fó.

Enkuantu partidu PD nu'udar partidu demokrátiku ida ne'ebé mak iha responsabilidade boot atu instala valór demokrátiku ba iha prosesu konstrusaun Estadu.

"PD fó hanoin katak presiza kumpri konstituisaun, mantein ho valór demokrasia e ukun ne'e povu nian, ita presiza fó tempu ba povu atubele tuir eleisaun ho livre ho regra hothotu”, haktenik nia.

Maske iha pandemia Covid-19, maibé hakarak komprimentu nafatin konstituisaun no halo tuir prosesu hothotu. (*)