Tanba ne’e, dokumentu ne’ebé hatama hamutuk ema na’in-468 no iha selesaun dokumentus ema na’in-232 mak hakat ona ba faze ezame orál.
"Iha CNE Munisípiu Baukau agora ema na'in-232 mak hala'o hela interviu ba ofisiál sira ne'e, ita prepara ba eleisaun prezidente da repúblika ne’ebé sei mai iha 2022", dehan Diretór CNE Baukau, Jeráldo Dameo Belo, iha Baukau, kinta (06/01).
Kandidatu na'in-232 ne'ebé tuir ezame orál ne'e, sei prezisa de'it ema na'in-150 iha Munisípiu Baukau, tanba kada estasaun votasaun ofisiál na'in-ida mak sei halo supervizaun durante eleisaun la'o.
Nune’e, kandidatu na’in-150 ne'ebé mak liu iha ezame orál sei tuir tan formasaun husi Sekretáriadu Tékniku Administrasaun Eleitorál (STAE).
"Aumesmu tempu iha edukasaun sivika, edukasaun votantes, ne'ebé mak sei hala'o husi STAE, sira halo supervizaun ba atividade ne'ebé STAE ba halo," nia hatete
Kandidatu, Olimpia Domingas de Carvalho hatete, liuhusi vaga ne'ebé CNE loke ba públiku, hanesan fó oportunidade ba ema hotu atu konkore hodi buka esperensia.
"Ha'u garante, tanba eleisaun-ida ne'e parte STAE ho CNE servisu hamutuk prosesu demokrátiku ida ne'e la'o di'ak no susesu," katak nia
Nia parte promete, bainhira liu iha ezame orál refere, sei servisu di'ak tuir lei CNE nian ne'ebé estabelese ona hanesan ofisiál supervizaun ba eleisaun prezidensiál.
Enkuatu iha tinan 2022 ba eleisaun prezidensiál iha Munisípiu Baukau sentru votasaun hamutuk 125 no estasaun votasaun-150 ne’ebé sei akompaña husi ofisiál supervizaun na’in-150. (*)