“Agora daudaun ami seidauk iha hanoin atu halo fiskalizasaun tanba ami foin tama iha tinan foun. Maibé ami sei halo programa no planu ba fiskalizasaun iha terrenu", dehan Deputadu Bankada FRETILIN, Fabião de Oliveira, iha PN, kuarta (05/01).
Tanba durante ne'e, Komisaun E rasik iha duni planu atu halo fiskalizasaun diretamente ba projetu ida ne'e maibé tanba situasaun Covid-19 entaun labele dezloka ba rai-li’ur.
Maibé agora, depende ba deliberasaun komisaun E nian atubele deside ekipa ruma oinsá mak bele halo fiskalizasaun.
Bankada Fretilin rasik nota prosesu ba Ró Haksolok tinan barak ona seidauk finaliza tanba nia prosesu la’ós fasíl presiza lori tempu.
Tanba ko'alia kona-ba kauza Ró Haksolok ne'e, kabe ba kompeténsia Governu sentral nian, no Parlamentu Nasionál nia kompeténsia mak hatene aprova orsamentu hodi aloka ba konstrusaun to’o lori ro ne'e mai Timor-Leste.
Mesmu nune'e, Deputadu Fretilin ne'e fiar katak Ró Haksolok tempu ida sei mai tanba Parlamentu nia kompeténsia aprova osan ho esperansa atu finaliza nia prosesu hodi lori mai Timor-Leste.
Maibé Projetu Ró Haksolok ne'e konstrui husi kompaña Atlantic Eagle Ship Building iha nasaun Portugal, bazeia ba akordu ne'ebe asina iha tinan 2014, no konsege inaugura iha fulan-outubru tinan 2017.
Ba Ró Haksolok ne’e rasik Timor-Leste, aloka orsamentu ho montante millaun €13,7, no Ró Haksolok iha kapasidade atu tula ema na’in-377 no karreta 15. (*)
