“Husu tinan foun ne’ebé mai tenke reflete molok tama ne’ebá, e hadi’a buat ne’ebé halo sala iha tinan kotuk halo di'ak liután, liliu ba líder nasionál sira, labele loroloron husi ibun ba ibun dehan katak na’in-ulun sira la hamutuk, la hamutuk ne’e iha ideia mas fizikamente sei hamutuk nafatin, agora atu iha konsensu só diálogu ita tur hamutuk atu lori nasaun nia distinu ba oin, ne’e só ita tau ita-nia hanoin hamutuk, mas ida-idak ko'alia iha nia fatin, ne’e nunka la’o ba oin, mak ha’u apela ba ita-nia líder, ukun na'in sira, liliu bolu líder istóriku sira buka malu porque tinan lima mai ne’e, ultimu oportunidade ba ami katuas sira", dehan Lere hafoin hasoru malu ho PR Lú Olo iha Palasíu Prezidensiál Bairopite, kuarta (291/12).

Tanba ne’e, hakarak apela ba líder sira bele aproveita tinan ida ikus ne’e (2022-2027), atu halo oinsá ba jerasaun foun sira ne’ebé la'o tuir dalan di’ak, atu lori nasaun ba progresu dezenvolvimentu.

"Tinan 2022, Timor-Leste sei realiza eleisaun prezidensiál, hodi hili Prezidente Repúblika ba mandatu tinan lima, no tinan 2023 sei realiza eleisaun Parlamentar hanesan oportunidade ikus ba líder nasionál sira, hodi entrega poder ba jerasaun foun sira, oinsá ukun tuir dalan, hodi dezenvolve Timor-Leste", afirma nia

Enkuantu aproveita oportunidade ida ne'e nu'udar povu Katólika, povo fiar na'in Tenente Jenerál Lere hodi nia naran rasik, lori instituisaun nia naran no família nia naran hato'o, sira-nia boas festas do santo natal ne'ebé hakat liu dadaun no boas festas feliz prósperu ba tinan foun 2022 ne'ebé sei mai.

"Ha'u hatene katak, loron ou festa natal, festa família nian e festa labarik sira-nian, tanba menino Jesus moris iha 25 de dezembru, festa ba labarik sira-nian”, hatete Lere. 

Ho tinan foun ne'ebé sei mai sei fó dezafiu ba Timor-Leste, liliu ba líder sira, momentu ida reflesaun ninian atubele kurize bele hadi’a saida mak halo iha tinan kotuk, tanba iha defeitu ida ba ukun na'in sira.

 “Defeitu mak saida?. Ita nunka fó kontinuidade ba ita-nia antesesor ida ne'ebé ita troka tiha ona, mas ita mai halo fali buat foun, ne'e mak ha'u apela ba ha'u-nia instituisaun laran forsa armada, loron ida ha'u sai karik ema ida ne'ebé troka ha'u ou jenerál ne'ebé troka ha'u labele halo buat ne'ebé foun, tenke halo buat ne'ebé ha'u halo tiha ona, kurizi buat ne'ebé ha'u halo sala, mais imi mai halo fali buat foun, ita sei sai sabraut hotu", esplika nia.

Nune'e, husu tinan foun ne'ebé mai tenke reflete molok tama iha ne'ebá, no hadi’a buat ne'ebé halo sala iha tinan kotuk no halo di'ak liután buat ne'ebé halo di'ak ona. (*)