"Dekretu lei haruka ba Prezidensia Repúblika iha dia um (1) fulan Dezembru maibé informasaun seluk husi ne'e ami seidauk hatene, maibé reuniaun ne'e hotu tiha ha'u husu fali Gabineti apoiu Juridiku atu rejistu prosesu ne'e mak imi atu nune'e bele halo klaru", dehan Fidelis ba Jornalista iha palásiu Governu, kuarta (29/12).
Antes ne'e Prezidente Repúblika (PR), Francisco Guterres 'Lú Olo' deklara, subsídiu ba jornalista promulga kleur tiha ona.
"Jornalista sira-nian prontu kona-ba frontline nian, taun ne'e ha'u promulga tiha ona iha tempu kleur, importante agora governu implementa de'it", dehan PR Lú Olo.
Dekretu tuan kona-ba subsídiu jornalista nian Governu haruka ba PR, maibé prezidente veta tiha, ikus fali governu halo alterasaun lei foun haruka fali no Prezidente promulga tiha ona.
Antes ne'e, Konsellu Ministru aprova ona dekretu lei ba jornalista sira iha loron kinta (11/11), ne'ebé aprezenta ona husi Ministru Asuntu Parlemtar e Komunikasaun Sosial (MAPKomS), Francisco Martins Jerónimo.
Nune'e iha loron 22 fulan-dezembru, Ministru Assuntu Parlamentár Komunikasaun Sosiál (MAPKomS), Francisco Jerónimo Martins atu halo pagamentu ba jornalista sira depende filafali ba publikasaun Jornál Repúblika.
"Ha'u haruka ha'u-nia asesor sira buka tuir informasaun ne'ebé dehan Prezidente Repúblika (PR) promulga ona subsidiu liña frente ba jornalista, maibé jornál repúblika seidauk fó sai informasaun kona-ba lei ida ne'e, entaun ita seidauk bele halo pagamentur", informa Ministru Francisco Martins.
Tuir informasaun Prezidente Repúblika promulga ona lei subsídiu lifña frente ba jornalista, maibé ne'e dalaruma promulga lei dahuluk nia.
"PR dehan lei ne'e promulga tiha ona, maibé ha'u haree nia dehan lei ida uluk ne'e karik, tanba lei ida uluk ne'e ba de'it fulan rua, entaun lei ne'e mate tiha ona nia la iha kontinuidade, nune'e ita presiza lei foun, no ida foun ne'e ba ona iha PR maibé ha'u seidauk simu promulgasaun ne'e, maibé ha'u nafatin haruka asesor sira haree lei ne'e para bele halo despaixu Ministerial hodi bele ezekuta", afirma nia.
Maske tarde iha prosesu dekretu lei ba renumeratoriu ba jornalista maibé sira iha posibilidade no direitu atu hetan osan liña frente, ba maske tabela US$5 kada loron. (*)