Tanba tinan 2021, tinan ida ne’ebé ema hotu hasoru dezafiu boot rua, afeita ba saúde públiku no estragu sira ba infraestrutura, pandemia Covid-19 no situasaun kalamidade públiku.
Situasaun sira ne’e Estadu hasoru perturba mós ba servisu balun ne’ebé atu fó atendimentu ba Públiku liuhusi ida-idak ninia profisaun, mezmu hanesan ne’e, servisu barak mak halo hamutuk ona iha tinan 2021 nian.
"Ita besik dadaun ona tama ba loron Natal, hodi ha’u-nia Naran no Funsionáriu hothotu ne’ebé hakna’ar-an iha MAPKomS, hakarak hato’o votu Natal Santu, Dame no ksolok ba Timoroan hothotu no uma kain ida-idak ne’ebé namkari lemorai iha Timor-Leste nia laran nomós iha rai liur”, dehan Ministru Francisco Martins, iha Gabinete MAPKomS, kinta (23/12).
Iha biban espesial ida ne’e, hakarak hato’o mós votu Natal Santu, Dame no Ksolok ba Funsionáriu sira hotu Ministériu nian, ne’ebé hakna’ar-an iha Gabinete sira no Divizaun ida-idak nian, ba profisionál komunikasaun Sosiál sira, tantu iha mídia Estadu nian, RTTL-EP no TATOLI,IP, mídia privadu sira, estasaun Rádiu komunidade sira, sentru informasaun komunitaria sira no parseiru sira servisu komunikasaun sosiál sira iha Nasional no Internasionál.
"Hein katak mensajen dame no esperansa Natal nian, leno ita hotu atu tama tinan foun 2022, ho espiritu no dispozisaun foun, hodi hasoru dazafiu foun ne’ebé aprezenta mai ita ida-idak. Ha’u-nia votu Natal Santu no Tinan foun kmanek mai ita hotu”, hato’o nia. (*)