Print this page

Ohin, PR Lú Olo Hahú Feriadu ba Natal no Tinan Foun 

By December 21, 2021 938
Prezidente Repúblika (PR), Francisco Guterres 'Lú Olo'. Prezidente Repúblika (PR), Francisco Guterres 'Lú Olo'. Foto Suplay

Tempotimor (Dili)-Prezidente Repúblika (PR), Francisco Guterres 'Lú Olo', ohin, loron 21 dezembru 2021, hahú feriadu  ba festa natal 2021 ho tinan foun 2022, hafoin tama fali servisu iha loron 5 Janeiru 2022.

"Ba tinan 2021, Prezidente Lú Olo haruka ona karta ba Prezidente Parlamentu Nasional katak, tama férias  husi loron 21 dezembru to’o 5 de janeiru. No durante períodu ne’e Prezidente Lú Olo  sei la tama Palásiu hanesan baibain, maibé sei hala’o nafatin servisu sira tuir ninia kompeténsia nu’udar órgaun unipesoál (ema ida de’it)", dehan Xefe Kaza Sivil Prezidente Repúblika, Francisco Maria de Vasconcelhos liuhusi Komunikadu Imprensa, tersa (21/12).

Nu’udar órgaun unipesoal, Prezidente Repúblika labele delega ba ema ne’ebé de’it kna’ar importante ba vida Nasaun no Povu nian hanesan promulgasaun (ka veto) ba Lei no Dekretu-Lei sira. 

Kna’ar importante tebes ida ba Prezidente Repúblika, husi ohin ba oin, mak tetu Dekretu n. 55/V aprova husi Parlamentu Nasional iha loron 18 dezembru 2021 kona-ba Orsamentu Jerál Estadu 2022. 

Dekretu ne’e tama iha loron 20 dezembru 2021, iha Palásiu no Prezidente Repúblika sei haree ida ne’e durante períodu férias tanba diploma ida ne’e importante tebes ba vida Nasaun no Povu nian.

Aleinde Lei Orsamentu Jerál Estadu, iha mós diploma legal lubuk ida ne’ebé Prezidente Repúblika tenke foti desizaun durante períodu fériadu. 

Tuir Estatutu Titulares Órgauns Soberania, (alínea a), númeru 4, artigu 10, Lei n°7/2007, 25 jullu altera husi Lei n°7/2017, 26 abril), tinan-tinan, titular no membru órgaun soberania sira iha direitu ba períodu férias loron 30 no bele akumula babeibeik bainhira labele hasai tempu férias tanba motivu servisu.  

Tuir lei haruka, sira sei la lakon direitu atu simu remunerasaun iha finál mandatu, karik la hasai períodu tomak férias tinan-tinan. (*)

Rate this item
(0 votes)
Last modified on Tuesday, 21 December 2021 18:13
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items