"Orsamentu por programa ne’ebé sai pontu de orgulho ba Xefe Governu de Faktu lakon tiha nia valór, ka nakfilak ba slogan mamuk ida ne’ebé laiha sentidu. Tanba Bankada Aitongka (FRETILIN) obriga aloka orsamentu ba programa ne’ebé Governu rasik la prevee”, dehan nia iha plenária PN, kinta (16/12).
Bankada CNRT haree katak ho proposta adisional ne’ebé mak PN aprezenta, siknifika katak, Parlamentu mak elabora orsamentu hodi haruka ba Governu atu ezekuta, mezmu Governu rasik hatene ninia limitasaun ka kapasidade atu ezekuta.
"Governu de Faktu laiha kbi’it atu defende Orsamentu ne’ebé aprova ona iha Konsellu Ministru, bainhira Bankada Aitongka uza podér parlamentár nian hodi impoin no obriga hasa’e tetu orsamentu husi Biliaun US$1.7 sa’e to’o Biliaun US$2, ka iha aumentu kuaze 17%”, hatete nia.
Husi alokasaun orsamentu ne’ebé konsege sa'e kuaze pursentu 17, maka CNRT haree katak dala ruma orsamentu hirak ne'e hasa'e ba Ministeriu sira ne’ebé lidera husi partidu FRETILIN nian, mezmuké sistema free balansu hatudu momoos katak Ministériu sira ne’e laiha kapasidade atu ezekuta Orsamentu Jerál Estadu 2021.
"Xefe Governu de Faktu lansa retórika katak Orsamentu Jerál Estadu 2022 nia karáter mak orsamentu por programa, maibé realidade Bankada Governu nian hato’o proposta hodi sobu tiha estrutura orsamentu nian”, afirma nia.
Husi realidade hirak ne'e bele dehan laiha koordenasaun entre Membru Governu ho Xefe Governu, tanba Governu determina ona tetu orsamentu maibé Membru Governu sira kolabora ho deputadu sira hodi kontinua hatama proposta hodi aumenta osan ba ministériu ne’ebé sira lidera, liliu aumentu barak liuba Ministériu ida ne’ebé FRETILIN lidera. (*)