"Ita hotu preokupa, tan sa mak hakoi tiha iha rai, ita ba kee filafali, ita atu dignifika, dignifika mak hasai sira mai tau iha Jardin herói (taman makam pahalawan), maibé tanba ho situasaun polítika la'o durante 2014-2015 sai impendimentu ba buat sira ne'e hotu", dehan Meta Malik ba komunidade Bobonaro iha Salaun Jinajiu Maliana, kuarta (15/12).
Tanba ne'e komunidade Bobonaro atu halo manifestasaun hasoru Ministru Asuntu Kombatente Libertasuan Nasional tenke hanoin didi'ak.
"Restu mortais sira la hakoi imi atu halo demo, nune'e mós ba kaixaun no urna sira, imi atu halo demo ba ministru, No, tanba la'ós ministru ida metin hela iha 2012, mak ministru ne'e la fó atensaun, maibé situasaun krize polítika ne'ebé akontese remodelasaun mak sai hela impaktu to'o ohin 2021 ita tama ona ba 2022", deklara nia.
Haree ba pandemia Covid-19 ne'ebé mosu iha rai laran, hodi fó impedimentu mós konstrusaun Jardin erói iha fulan-agustu 2021, maibé hetan rezultadu pozitivu konkursu públiku tama ba prosesu konstrusaun iha Novembru.
Komunidade Bobonaro, Suku Lahomea, Apolinario Barros, tanba Governu hasai tiha regulamentu hodi kee sai retu mortais sira-nia ruin maibé seidauk hakoi no rai hela iha ossuáriu to'o urna balun aat ona.
"Maluk sira ne'e tenke hakoi ona 2022, selae ami halo demo, sala tan saida?. Ministériu hothotu osan tenke taka, tenke hakoi mate ruin sira ne'e, sira ne'e sala saida?, dala ida tan ha'u fila ba Prezidente, maun sira troka malu ne'e mesak maun sira ita hotu mai husi ailaran de'it, ha'u la komprende sira ne'e bainhira mak ita atu hakoi, sira ne'e la sala buat ida, lori sira mak ita ko'alia independénsia, se la sira ita la ko'alia independénsia, ne'e ha'u dehan lolos ba ita hotu iha ne'e", deklara nia. (*)