“Atu kandidata-an ba PR ne'e nu'udar sidadaun ida iha direitu atu kompete, maibé se ha’u kandidata-an ba prezidente Repúblika depende povu mak determina, se povu hili ha’u sai prezidente repúblika, no sai aman ba nasaun ha’u prontu simu de’it, se povu lakohi, ita labele obriga-an ba ne’eba, tanba ne’e demokrasia, ha’u hanoin katak fator determinante mak povu”, Tenente Jenerál Lere, bainhira ba vizita membru F-FDTL foun iha Metinaro, kuarta (15/12).

Tanba kandidata-an ba PR ne'e nu'udar direitu ba sidadaun sé de'it, tanba ne'e nia parte prontu bainhira povu iha konfiansa.

“Tanba ha’u hateten bebeik, se ne’e direitu ida ba kualquer sidadaun, ha’u mos la’ós kualker sidadaun babain, ha’u veteranu 24 anos, ha’u membru komité sentral Fretilin e ha’u komanda forsa durante 24 anos, e mai komanda tan forsa profesionál ne’e durante 20 anos”, afirma nia.

Tanba ne’e, ha nia diskursu iha membru foun F-FDTL nia oin, katak tempu ida nia sei husik hela Instituisaun Forsa ne’ebe nia lidera durante tinan naruk ne’e.

“Ha'u-nia tinan 60 ona, to’o ona tempu atu reforma, ita labele dehan katak instituisaun ida la’ós ema ida ninian, instituiasaun ema hotu nian, kualquer instituisaun kuandu to’o nian tempu fó ba ema seluk”, hatete nia.

Tanba estatutu instituisaun mós fó dalan katak tinan 60 bele reforma ona, no tinan 55 ne'e rezerva hodi hein reforma. 

Bainhira  reforma husi Institutuisaun militár, nu'udar Timoroan iha dever rua mak sei nafatin halo, servi Estadu no servi família.

“Ne’e mak ha’u dehan, kuandu ha’u sai ne’e nu'udar timoroan ha’u bele hala'o nafatin dever rua mak, serbi Estadu no familia, tanba la’ós atu sai prezidente republika no ministru mak foin bele servi rai no povu ida ne’e, maibé iha liur mós bele servi rai no povu ida ne’e, kualquer atividade, naran apoiu dezvolvimentu no hakmatek ne'e ha’u fó kontribuisaun”, afirma nia. (*)