"Semitériu iha Bekussi lakleur tan nakonu ona, maibé Semitériu atu hakoi mate sira iha Dili ne'e, agora preparadu ona iha Metinaru, ne'ebé bainhira iha Bekussi nakonu, mate sira ne'ebé iha Dili sei hodi hotu ba hakoi iha Metinaru, fatin ne'ebé Governu prepara ona, atu hakoi mate sira ne'e", ingorma Ministru MAE, Miguel Pereira de Carvalho, hafoin hasoru malu ho Prezidente Repúblika, Francisco Guterres ‘Lú Olo’, iha Palasíu Prezidensiál Bairopite, segunda (13/12).
Tanba tuir estimasaun husi autoridade Munisipál Dili katak, husi fulan ida ne'e (dezembru) Semitériu Bekussi sei nakonu, maibé agora bele akontese to'o fulan-janeiru 2022.
"Munisípiu Dili iha ona, kontratu kofeiru sira atu hahú ona halo konstrusaun, e até halo ona konstrusaun ba Semitériu iha Metinaru, hodi fasilita sidadaun sira ne'ebé mate iha munisípiu Dili hodi ba hakoi iha ne'ebá", haktuir nia.
Rai ne’ebé prepara ba Semitériu iha Metinaru kuaze ektare 15, tanba ne'e fó tempu naton ba autoridade Munisipál Dili, ho Ministériu Administrasaun Estatal atu bele define politika sira, regra ho dekretu lei sira atubele fó solusaun ba kestaun ne’e. (*)