"Uluk sentru evakuasaun hamutuk 52 mak ita rejista, no sentru evakuasaun hamutuk 50 mak ita taka ona no sira fila ba família, hela sentru evakuasaun rua mak sei ativu, iha Hera família hamutuk 14, kompostu husi ema 83, iha antigu restaurante Metiaut nia família 8 kompostu husi ema 57”, dehan Superintendente Ismael Babo, iha edifísiu SEPS, Kaikoli, segunda (13/12).

Sentru evakuasaun rua ne'ebé sei ativu ne'e tanba sira iha problema ba rai, katak sira-nia rai ne'ebé seguru husi inundasaun ne'e laiha, nune'e sira seidauk bele fila ba uma.

"Tanba sira-nia fatin uluk sira hela ba mak, parte tun ba Bidau Mota nia ne'e, inklui Hera kuandu udan boot mota sempre mai sobu, ne'ebé sira seidauk bele deside atu ba hela fali iha ne'eba, no ita mós la fó autorizasaun atu sira ba hela fali fatin ne'ebé perna fó risku ona”, deklara nia.

Nune'e lori Governu no Estadu nia fatin, aproxima nafatin hodi fó hatene ba maluk sira katak nu'udar sidadaun Timor iha mós dever atu ajuda Estadu hodi identifika sira-nia rai hafoin Estadu fó osan oituan no matéria konstrusaun.

"Tanba Estadu ajuda fó osan oituan no matéria konstrusaun, sira mós ajuda Estadu identifika sira-nia rai ne'ebé mak sees husi risku ba dezastre, karik rai iha Dili laiha, iha Munisípiu rai iha sira bele informa ba ita no ita fó apoiu hodi sira ba halo sira-nia uma iha fatin ne’ebé seguru, atu nune'e ita bele asegura nafatin ema hotu nia vida iha tempu udan”, dehan nia. (*)