Tanba ne’e, Xefe Estadu Sei hala'o diálogu ho autoridade no reprezentante komunidade iha munisípiu Bobonaro aban (15/12) hodi rona direta preokupasoens sira.

"Diálogu iha munisípiu Bobonaro, Prezidente Repúblika sei esplika kona-ba situasaun polítika rai-laran no rona preokupasoins husi autoridade lokál, organizasaun sosiedade sivíl, veteranus, konfisoins relijioza, foin-sa’e no estudantes kona-ba prosesu dezenvolvimentu iha nível nasionál no lokál", dehan Xefe Kaza Sivil Prezidente Repúblika, Francisco Maria de Vasconcelos liuhusi komunikadu imprensa, segunda (14/12).

Iha diálogu ne'e, Prezidente Repúblika sei hetan  akompaña husi membru VIII Governu Konstitusionál atu hatán ba preokupasoins husi reprezentante sira iha  munisípiu refere, nune'e ba oin, orgaun ezekutivu bele halo esforsu oioin hodi responde asuntus ne’ebé autoridade lokál, líder komunitária sira foti iha diálogu.

Enkuantu, Prezidente Repúblika sei sai husi Díli ba munisípiu Bobonaro, iha 14 dezembru 2021 hodi hala'o diálogu ho komunidade sira iha loron 15 dezembru 2021, depois sei kontinua iha minisípiu Likisá iha loron 17 dezembru 2021 no PR sei filafali mai sidade kapitál, iha 18 dezembru 2021.

Maibé tuir planu ba programa, Prezidente Repúblika sei presta omenajen ba erói no martire libertasaun Pátria iha Osoariu Maliana no Likisá, kuda ai-simbolikamente no entrega ai tokon ida-resin ba reprezentante husi munisípiu 12 no Rejiaun Administrativa Espesiál Oekussi-Ambeno (RAEOA) nu’udar parte husi kampaña ne’ebé Xefe Estadu inisia “Sidadaun Ida, Ai-oan Ida”.

Antes ne’e, Prezidente Repúblika halo ona vizita traballu ba munisípiu Vikiké, Kovalima, Lautein, Baukau, Ermera, Manufahi no Ainaro. (*)