"STAE iha tempu agora dadauk preparadu los, atubele realiza eleisaun Prezidensiál iha tinan oin", dehan Ministru Miguel hafoin hasoru malu ho PR Lú Olo iha Palasíu Prezidensiál Bairopite, segunda (13/12).

Preparativu ne'ebé STAE halo ona hanesan, faze ida agora mak, hahú ona konklui rekrutamentu ba brigadista sira hamutuk 200, no iha tempu tuir mai sei rekruta mós esensia eleitorál hamutuk 15 mill, atu servisu iha sentru votasaun no estasaun votasaun iha territóriu Timor-Leste.

"Ekipamentu hothotu STAE halo akizasaun hotu ona, únika ekipamentu ne'ebé foin mak konklui nia prosesu mak tinta, maibé Governu servisu hamutuk ona ho UNDP atu hodi tinta ne'e mai, no iha inisiu fevereiru tinta sira ne'e sei to'o iha Dili, nune'e bele konklui preparativu lojistika sira hotu atu eleisaun bele halo iha fmarsu", reafirma nia.

Ekipamentu material ba eleisaun ne'e, Governu dezagrega ba forma rua, ida material sensitivu, nomós sira ne'ebé la sensitivu.

La sensitivu sira mak hanesan, material deskritoriu sira no seluk tan. No material ne'ebé sentivu ne'e hanesan, boletin votu, selus, kabinu votu, maibé sira ne'e preparadu hotu ona, STAE halo empakotamentu no agora haruka hotu ona ba munsípiu sira.

"Ne'ebé lojistikamente STAE preparadu atubele realiza eleisaun Prezidensiál 2022”, dehan nia.

Entretantu iha tinan 2017, eleisaun iha tempu ne'ebá eleitór sira iha de'it rihun-784.280, ikus liu dadus ne'ebé STAE fó sai, depois  halo resenseamentu autorizasaun baze dadus STAE rejistu ona eleitór hamutuk rihun-850.487.

"Iha aumentu kompara ho eleitór 2017 ho ohin loron nian iha tan aumentu rihun-66.202 eleitór, tanba ita halo autorizasaun baze dadus ne'e, ne'e atualiza mós ba ema ne'ebé mak laiha ona mundu ita hasai tiha dadus husi baze dadus, e eleitór foun sira ita resenseia no sira seluk tán", esplika Miguel.

Prezidente CNE, José Agostinho da Costa Belo hatutan, desde 1 jullu hafoin STAE hato'o kalendáriu no CNE komesa kedas supervizaun ba resenseamentu eleitorál iha rai laran, inklui mós rai liur ne'e prosesu tomak ne'ebé la'o.

"Segundu CNE halo servisu  ezesisiu oituan servisu hamutuk ho autoridade sira iha munisípiu e komunidade tomak oinsá atubele halo avaliasaun rezultadu kona-ba eleisaun sira ne'ebé liu tiha ona, e sira-nia perspetiva mai oin ne'e saida mak sira bele halo liliu ligadu ho eleisaun ne'ebé kualidade", haktuir nia. (*)