“Governu nu’udar jestór ba rekursu Estadu nian, presiza fó atensaun ba kamada foinsa’e sira, atubele atualiza sira-nia kapasidade, promove sira-nia inisiativa no kreatividade”, deklara Deputadu PD, Mariano ‘Assanami’ Sabino, iha ninia intervensaun ba debate Orsamentu Jerál Estagu (OJE) 2022 faze espesialidade, kinta (09/12).
Tanba Konsellu Nasionál Juventude Timor-Leste (CNJTL) ne’ebé tranforma husi Prejudium Juventude Loriku As’uain no bazeia ba rezolusaun Governu nú, 27/2016, de 31 de agostu, nu’udar orgaun umbrella ba organizasaun joven iha terióriu Timor laran tomak no parseiru prinsipál Governu nian ba asuntu juventude, tantu organizasaun rezisténsia, partidária no orgaun juventude iha Munisípiu no Postu Administrativu, atubele hala’o nia papel sira presiza pontu apoiu husi Estadu.
Ho nune’e PD propoin atu foti fundu rezerva millaun US$1.250 husi sub-programa diversifikasaun ekonómika ne’ebé atu fó kréditu ba univesridade privada sira ne’ebé la klaru no la lójika ne’e atu aumenta ba sub-programa dezenvolvimentu no promove área juventude liuhusi fasilitasaun orgaun CNJTL ho nia programa sira.
“Kontinuasaun ba programa juventude proteje ba estabilidade no unidade nasionál liuhusi atividade organiza juventude partidária iha forum komunikasaun juventude partidária ne’ebé estabele husi Prezidente Parlamentu Nasionál iha 2016 ho objetivu atu forma joven sira bele moris ho harmonia maske diferente polítika no ideolójia”, afirma nia.
Tanba apoiu atividade parlamentu juventude nian iha CPLP, halo supervizaun ba atividade juventude parlamentu foinsa’e komemorasaun loron nasionál juventude no masakre Santa Cruz, kapasitasaun juventude hodi hasa’e sira-nia kualidade komunkasaun, kursu lingua Inglés no portugés, komputadór, manajementu, organizasaun no finanseiru, promove no kapasita foinsa’e sira-nia koñesimentu.
Maske proposta ne’e bankada demokrátiku aprezenta ona, maibé Governu liuhusi Sekretáriu Estadu Juventude no Desportu (SEJD), Abrão Saldanha “Nokosiku”, rezeita proposta refere, tanba osan ba CNJTL tinan 2022 nian sei hetan apoiu husi Gabinete Apoiu Sosiedade Sivíl (GASC).
“Aumenta osan ba CNJTL, orsamentu ne’ebé submete ne’e iha hela, depois orsamentu iha fatin seluk ida mak fundu sosiedade sivíl ne’ebé tutela iha gabinete Primeiru Ministru, agora ami ho CNJTL diskute hela para sira prienxe rekejitus balun nune’e sira mós bele asesu liuhusi ne’ebá, ne’ebé orsamentu iha hela, ita garantidu ba 2022”, dehan Abrão. (*)
