Maske, Parlamentu Nasionál rasik hasai ona rezolusaun númeru 21/2021 hodi haforsa desizaun konstrusaun edifísiu iha Kaikoli, maibé Governu seidauk bele anunsia desizaun ruma atubele konstrui edifísiu refere.
"Se agora sira ne'e mak ita tenke hasai, ita hapara atividade lubuk ida. Ne’ebé atividade sira ne'e mak direta fó nia atendimentu ba komunidade sira. Ho razaun sira ne'e mak ita seidauk deside dehan atu fó ka la fó”, dehan Sekretáriu Estadu Tera Propriedade (SETP), Mario Ximenes iha PN, sesta (03/12).
Tanba fatin iha Kaikoli, destina ona ba Polísia Siéntifika no Investigasaun Kriminál (PSIK), Prokuradór Jerál Repúblika (PJR), Batellaun Orden Públiku (BOP), nomos Diresaun kona-ba Ambulánsia, estatístika, Agua Saneamentu,no Obras Públiku.
Bainhira Governu entrega fatin ne'e ba PN mak sei afeta ba servisu instituisaun Estadu sira ne’ebé dadauk ejiste ona iha Kaikoli.
Tanba ne'e Governu hakarak klarifika razaun tékniku sira ne'e ba Parlamentu Nasionál atubele hola enkonsiderasaun.
Parte Governu mós indentifika ona fatin balun eis finansa Indonézia nian iha Kaikoli, husi estrada kraik to'o estrada leten ne'e bele entrega ba PN tanba fatin ne'e kuaze ektare 3 mamuk hela.
"Fatin oituan ne'e purvolta 3 ektare, se ida ne'e mak Prezidente PN, karik disponível ba fatin ida ne'e, Governu liuhusi Ministériu Justisa, teknikamente terra no propriedade prontu fó apoiu atu identifika, hodi sukat foun filafali hodi bele konsidra ba PN, atu konstrui edifísiu PN”, esplika nia.
Enkuantu planu identifika rai ba PN atu konstrui edifísiu ne'e, komesa iha tinan 2005-2006 to'o agora, Governu finaliza ninia prosesu atu hari’i edifísiu PN primeiru dehan Tasitolu, maibé kansela no lahatene razaun saida.
Nune'e identifika tan rai iha Aitarak Laran, husi Gabinete Prezidente Republika nia sorin, kuaze ektare 4 maibé hetan kansella husi Parlamentu Nasionál tanba kestaun seguransa labele konstrui instituisaun nasaun nian, rua hamutuk.
Aleinde identifika mós rai iha Hera, maibé la konsege, nomós disponibiliza tan rai kuaze ektare 70 iha foho leten ida iha Beduku maibé ida ne'e mós kansela. (*)
