Tanba apresentasaun relatóriu ne’e presiza análiza rezumu ba pontu importante no esénsial sira husi proposta Lei Orsamentu Jerál Estadu (OJE) 2022, atu labele okupa tempu to'o loron-tolu.
"Tanba komisaun C nia lolos mós ita dehan iha ne'e aprezenta relatóriu la'ós halo leitura ba relatóriu, buat rua ne'e la hanesan, ida aprezenta relatóriu ne'e siknifika se relatóriu mahar ka mihis, tenke halo ezersisiu ida atu halo aprezentasaun tuir tempu ne’ebé iha”, dehan nia iha PN, kuarta (01/12).
Maske tradisaun ne'e babain deputadu sira halo leitura, maibé agora mak halo leitura hotu ba komisaun ida-idak nian, ida ne'e sei okupa tempu to'o loron-3.
Tanba ne'e, husu komisaun tenke prioritiza mak konkluzaun, rekomendasaun iha diskusaun OJE 2022.
"Iha konferénsia líder bankada, ha'u aviza tiha ona, kada komisaun halo rezumu para atu fasilita komisaun C, sé seidauk iha. E momentu ne'e ha’u promete kedas minitu lima de'it, labele liu tanba ita ko’alia relatóriu ho pareser sektorial ne'e liga ona ba espesialidade nian ke orsida ita filafali ko'alia mak ida ne'e, de'it”, esplika nia.
Tanba tempu minutu 5 ne’ebé meza deside ne'e la siknifika atu halo leitura ba relatóriu tomak, maibé komisaun espesialidade sira mak presiza halo ezersisiu no halo rezumu relatóriu pareser hodi ajuda komisaun C, atubele destaka ba pontu esensial ne'ebé mak bele hetan atensaun lalais husi Governu.
"Komisaun C labele halo tan ezersisiu no rezumu ida ne'e ha’u hanoin tempu la to'o, mais ida ne'e hanesan inovasaun ida ne’ebé ita foin produz, ita hahú lai ho maneira ida ne'e, depois mak ita haree”, dehan nia. (*)