Líder gerilleiru ne’ebé deklara kestaun ne’e hodi responde Premiadu Nobel da Paz, José Ramos Horta nia deklarasaun iha munisípiu Ermera, postu administrativu Railaku, domingu 28 novembru, ne'ebé sujere no fó konsellu ba Lere di'ak liu lalika ko’alia politika.

"Ida ne'e ha'u agradese tebtebes ha'u-nia maun, ha'u konsidera nafatin ha'u-nia maun, ha'u agradese ba ninia konsellu, mas dehan katak, la bele ko'alia politiku ne'e. Politika ne'e, ita dehan katak, ne'e sentidu boot, ha'u nunka ko'alia kona-ba politika partidiaria, ha'u hatete katak, ha'u FRETILIN duni, mas ha'u militar, ha'u militar katak ha'u neutralidade ba estadu ida ne'e, ha'u tenke kumpri ha'u-nia militar”, dehan Tenente Jenerál Lere hafoin hasoru malu ho Prezidente Repúblika, Francisco Guterres ‘Lú Olo’ iha Palasíu Prezidensiál Bairopite, kuarta (01/12).

Lere hatete nia parte Jenerál mai husi FRETILIN, maibé Jenerál ba forsas armadas la'ós ba Fretilin.

Tanba ne’e, karik Tenente Jenerál Lere, uluk partidiaria iha tinan 2016 ne'e seriu. Maibé tinan 2016 la bele halimar, mas forsa armada hatudu duni ninia neutralidade hanesan mós ninia komandante, nia jenerál hatudu duni neutralidade, se la neutru karik 2016 ne'e problema boot.

"Mas ha'u agradese ba ha'u-nia maun Ramos Horta ba ninia konsellus, la'ós nia foin fó konsellu, maibé situasaun difisil nia fó nafatin, hanesan maun sira seluk, maun Mari, maun Xanana, buat sira ne'e hotu, e ha'u agradese ba sira-nia konsellu", hatutan Lere.

Tenete Jeneral dehan nia parte sei labele konkore ho bainhira Maun Xanana kandidata-an, tanba konsidera Xanana no líder sira seluk hanesan maun.

“Ezemplu se ha'u-nia maun Xanana mak kandidata-an ba Prezidente karik, ha'u sei ba konkore nia, ha'u la bele, quer dizer ha'u konsidera sira nafatin hanesan maun, la'ós atu tula liman mas, ha'u dehan katak, ha'u ne'e maun Xanana nia-oan sarani kedas, alende oan sarani, ha'u ne'e nia alin rasik, be agora nusa, ne'e ha'u tenke konsidera nia, la'ós atu husu para Xanama tula liman ka la tula liman, ha'u konsidera hanesan maun Xanana, maun Mari, Maun Ramos Horta, Lú Olo, Taur, ha'u konsidera sira nafatin", deklara nia.

Antes ne'e, Ramos Horta hatete, Lere hanesan ema ida ne'ebé di'ak , tanba ne'e sujere atu konsentra lai hodi labele ko'alia politika.

Entretantu deklarasaun hirak ne'e mosu tanba, Tenente Jenerál Lere hatete, nia rasik prontu atu ba kandidata-an ba Prezidente Repúblika periódu 2023-2027 karik partidu FRETILIN aseita hodi fó apoiu.( *)