"Governu iha semana oin mai tan sei halo diskusaun dekretu-lei ida kona-ba sentru akollamentu multifunsaun iha parte Governu nia laran”, dehan Fidelis ba jornalista sira iha Kampus Fakuldade Siénsia Sosiál, kinta (25/11).
Kestaun atu hari’i sentru akollamentu Multifunsaun ne'e atu prepara ba tempu naruk (longu prazu) nian hodi prepara ba vítima inundasaun ne'ebé mak sei akontese.
Tanba akontese inundasaun ne'e la'ós planeadu maibé ne'e dezastre ida ne'ebé mak Governu ho nia povu sira la espera atu akontese iha tempu udan.
"Ko'alia kona-ba bainhira mak hotu ne'e imi husu ba Ministériu relevante, maibé parte konsellu Ministru nian sei haree ba kestaun makro, kona-ba mikro nian ne'e imi husu ba Ministériu sira”, esplika nia.
Dadaun ne'e vítima dezastre naturál ne'ebé akontese iha loron 4 fulan-abríl liu ba to'o agora Governu seidauk rezolve tanba komunidade besik atusida-resin mak sei kontinua hela iha lona okos.
Kona-ba tékniku sira ba realizasaun uma inklui preparasaun tékniku sira ne'e, Ministériu Administrasaun Estatál (MAE) no Sekretáriu Estadu Protesaun Sivíl (SEPS) mak akompaña loroloron iha servisu vítima nian. (*)