Tanba, iha loron 18 fulan-novembru 2021, tuku 15.00, promulga Dekretu Parlamentu Nasionál númeru 53/V kona-ba alterasaun dahuluk ba Lei númeru 10/2004, Lei Sistema Saúde, no aprova medida esesionál no temporária hodi hatán vijilánsia sanitária ba pandemia moras Covid-19.

"Promulgasaun alterasaun dahuluk ba Lei Sistema Saúde bele ona aplika restrisaun balun ba ema nia direitu atu proteje saúde públika. Tanba ne’e, estadu la presiza ona implementa Estadu Emerjénsia”,deklara Prezidente Repúblika, Francisco Guterres ‘Lú Olo’, iha pájina Gabinete Prezidente Repúblika, ne’ebé www.tempotimor.com asesu sesta(19/11).

Implementasaun Estadu Emerjénsia uluk hala’o tanba nu’udar medida preventiva no kontrolu atu hases sidadaun hothotu husi kalamidade públika ne’ebé bele mosu husi Covid-19 liuhusi suspensaun ba direitu, dever no garantia balun ne’ebé konsagra ona iha Konstituisaun Repúblika Demokrátika Timor-Leste.

Iha Lei númeru 10/2004, 24 novembru, prevé ona, aliende ezisténsia sistema vijilánsia epidemolójika, medida vijilánsia sanitária.

Lei ne’e sei konsolida kuadru normativu ne’ebé fó-sai iha Lei Sistema Saúde, hodi haforsa kapasidade ordenamentu jurídiku atu hatán ho efikásia ba ejizénsia ba nesesidade protesaun vida no sidadaun ida-idak nia saúde.

Redasaun foun ba artigu 10 husi Lei Sistema Saúde, Parlamentu Nasionál atribui kompeténsia foun ba autoridade saúde nian relasiona ho vijilánsia epidemiolójika.

Nune’e, lei ne’e fó dalan ba autoridades kompetente relasiona ho vijilánsia epidemiolójika bele halo ezame médiku ba ema se de’it, rekolla amonstra biolójiku no korrespondente testes laboratóriu, restreiu ba kontaktu no vijilánsia no monitorizasaun, hanesan mós inspesiona balada no produtu biolójikus sira. 

Ba kestaun vijilánsia epidemiolójika, sidadaun idai-dak no profisionál no instituisaun saúde, públiku no privadu tenke kolabora ba fornesimentu dadus relevante iha aplikasaun rekomendasaun husi autoridade kompetente.

Nune’e mós artigu 11 númeru 1 ko’alia kona-ba vijilánsia sanitária ho aksaun sira atu elimina, diminui no prevene risku ba saúde públika no interven iha problema sanitáriu, produsaun no sirkulasaun ba bens no prestasaun servisu ho interese saúde abranje vasinasaun, kontrolu sanitáriu bens no servisu, lokál, edifísiu, portu, aeroportu no fronteira, deskontaminasaun no desinfektasaun, aprensaun ba produtu no suspensaun atividade ne’ebé prejudika risku ba saúde públika.

Diploma ne’e hetan aprovasaun ho unanimidade iha Parlamentu Nasionál, iha loron 3 fulan-novembru 2021.

Tuir Konstituisaun Repúblika Demokrátika Timor-Leste, artigu 57, konsagra direitu fundamental ba saúde no asisténsia médika no sanitária no Estadu iha dever atu promove no kria servisu nasionál saúde universal, jerál no gratuita. 

Pandemia Covid-19 ne’ebé mosu iha Xina no hadaet ba mundu, inklui Timor-Leste, ba dahuluk rejista kazu transmisaun coronavirus, iha marsu 2020, husi ne’ebá kedas Estadu deside implementa estadu emerjénsia nu’udar sasukat atu hases-an sidadaun hothotu husi kalamidade públika ne’ebé bele mosu husi Covid-19.

Liuhusi implementasaun estadu emerjénsia ho ninia medida prevensaun sira Timor-Leste konsege iha kontrolu ba Covid-19, ohin loron iha de’it kazu esporadiku iha munisípiu Dili, Baukau no  Bobonaro no munisípiu sira seluk la rejista kazu pozitivu Covid-19.

Desde marsu 2020 to’o 18 novembru 2021, Timor-Leste rejista kazu pozitivu hamutuk 19.814, no hamate ema na’in-122. (*)