Tempotimor (Baukau)-Portavóz Partidu Libertasaun Povu (PLP) Suku unidade-5 iha postu Administrativu Kelikai, Munisípiu Baukau, Joaquim Fernandes Ximenes konsidera deputadu bankada PLP, Noe da Silva Ximenes larespeita militante husi Suku Afaça nia votu.
Portavóz ne'e, hasai deklarasaun bazeia ba deputadu Noe da Silva ne'ebé levanta iha Parlamentu Nasionál katak, uma kbiit laek iha Suku Afaça oferese fali ba funisonáriu públiku no F-FDTL, maibé deklarasaun refere lalós.
"Ha'u lori Suku lima PLP manan iha Suku Afaça, maibé nia la respeita ami nia votus, ha'u la simu la konkorda señor Noe da Silva deputadu Marcal ‘Buka Tuir’ nia hahalok, ha'u rasik la simu, tanba ami hotu-hotu harii partidu", dehan Joaquim ba www.tempotimor.com, segunda (15/11).
Nia dehan, deputadu hakarak fizkaliza projetu hotu-hotu ne'ebé mak Governu halo iha teritóriu laran tomak, la'os tempu polítika partidu nian mak halo fizkalizasaun foti dadus ne'ebé lalós nakonu odio no vigansa, dala ruma deklarasaun ne'ebé deputadu Noe da Silva pasa iha Parlamentu Nasionál la hanoin kona nia militante iha Suku Afaça.
"Nia ódio vigansa hanesan ne'e, tanba agora Maun Xanana bolu ha'u, ha'u sai nia brigada ou konsellu vetéranus Munisípiu Baukau, depois mak nia halo ódio vigansa", nia konta
Portavóz ne'e afirma, iha periódu eleisaun prezidensiál tinan 2022 Prezidente partidu CNRT, Kay Rala Xanana Gusmão sei manan iha Suku Afaça, maibé partidu PLP sei la manan tán hanesan uluk.
Joaquim konsidera PLP manán tiha iha elisaun deputadu sira tur nonok tiha Parlamentu Nasionál nunka halo fiskalizasaun, maibé besik ona votasaun komesa kria deklarasaun polítika katak, uma ba kbi’it laek iha Suku Afaça oferese fali ba funisonáriu no F-FDTL. (*)
