Membru Komite Sentral Fretilin (CCF-sigla portugues) nasionál ne'ebé destakadu iha Baukau, Abrão Gabriel dos Santos Oliveira hatete, konferensia atu prepara ba hasoru eventu polítika tuir mai hanesan elisaun prezidensiál iha tinan oin 2021 no elisaun parlamentar iha tinan 2023.
"Re-organiza fali estrutura partidu, tanba eventu polítika barak akontese iha tinan hirak liu ba laiha tempu atu restrutura sub-nasionál inklui postu", dehan abrão ba jornalista iha salaun sentru konvensoens Baukau (CCB), domingu (14/11).
Nia hatutan, agenda importante iha konferensia refere sei hili mós reprezentante postu atu tuir konferensia Munisípiu ne'ebé tuir planu sei realiza iha loron 4 fulan-dezembru tinan 202.
Abrão afirma, Partidu Fretilin iha palavras de onra ne'ebé hatete a pratika criteria verdade, ne'ebé hatudu ona iha elisaun liu ba forsa Partidu hotu hamutuk mos nunka manan iha Baukau.
"Ami fiar ba oin sei organiza di’ak liu tán, atu atinji vitória iha 2023," Abrão argumenta
Nune'e, Koordenadór partidu Fretilin Postu Baukau Vila, Hernani de Jesús Araújo Ribeiro hatete, konferensia refere atu konsolida baze inklui hili reprezentante meza iha konferensia Munisípiu nian.
"Atu haforsa politika iha baze, konsolida ita-nia militantes sira iha baze atu haforsa politika ne'ebé tuir orientasaun komite sentral Fretilin haruka," dehan nia
Konferensia ne’e, delegadu sira husi suku 11 iha Postu Baukau Vila atu hili reprezentante meza hodi prepara ba konferensia nível Munisípiu nian ba mandatu tinan 5 husi 2021 to'o 2026.
Entertantu, totál partisipantes konferensia nível postu ba dala-V iha sentru konvenseons Baukau totál delegadu hamutuk na'in-351 ne’ebé mai husi suku 11 hanesan, Tirilolo, Bahú, Buibau, Seisal, Burúma, Samalari, Gariuai, Uailili, Triloka, Kaibada no Bukóli. (*)