Print this page

Kongresu Estraordináriu Konsege Lori Candido-Z’macar Lidera TLPU 

By November 13, 2021 676
Estrutura foun TLPU hamrik hodi halo assinatura ba akta ne’ebé aprova husi kongresista sira. Estrutura foun TLPU hamrik hodi halo assinatura ba akta ne’ebé aprova husi kongresista sira. Foto Tempo Timor

Tempotimor (Dili)-Timor Leste Press Union (TLPU) liuhusi kongresu estraordináriu ne’ebé hala’o iha loron sábadu (13/11) konsege lori Candido Alves sai Prezidente no Zezito da Silva ‘Z’macar’ sai Sekretáriu Jerál TLPU ba períodu 2021-2025.

Husi kandidatura Candido Alves ho Z’macar ne’ebé aprezenta husi kongresista sira hanesan pakete B, konsege halakon Jordão Henrique no Venidora iha pakote A.

Rejultadu votasaun ne’e iha Kongresu estraordináriu ne’e, Candido Alves hamutuk ho Zezito da Silva konsege troka estrutura tuan ne’ebé lidera husi Prezidente Manuel Pinto no Sekretáriu Jerál, Horácio Babo.

Totál kongresista ne’ebé fó votu ba pakote Candido Alves no Zezito da Silva hamutuk 135 no ba pakote husi Jordão Henrique ho Venidora iha votu 43.

Prezidente TLPU Eleitu, Candido Alves hatete, rezultadu ne’ebé anunsia husi meza la'ós ema ida mak manán, maibé jornalista iha TLPU hotu nia vitória.

"Ha'u ho misaun ida mak ne'e, TLPU ne'e ita hotu nian, sira ne'ebé lakon labele sente dehan lakon, ha’u ne’ebé manán la'ós manán atu ba loron leten, ha'u sei la'o ho imi, ha'u sei tur mós ho imi, no ita hotu ida de'it mak TLPU, ne'e tenke tau iha ida-idak nia fuan”, afirma Candido Alves iha Delta Nova, sábadu (13/11).

Husu mós jornalista sira, labele haree ba liafuan ne’ebé hato'o, no labele konsidera hanesan fukun ba sira tanba Prezidente TLPU eleitu ho misaun servisu hamutuk.

"Ha'u hakarak mak ne'e ita hotu servisu hamutuk hodi serví, tane, tetu, nune'e bele garante liberdade ba ita-nia rai, ne'e ba ita hotu jornalista nian”, dehan nia.

Enkuantu kongressu estraordináriu TLPU iha sesaun dader hetan partisipasaun husi Prezidente Konsellu Imprensa (KI), Vergílio Guterres, nomós kongrestista hamutuk na'in-179.

Aleinde iha parte loraik hetan partisipasaun husi Ministru Asuntu Parlamenár no Komunikasaun Sosiál (MAPKomS), Francisco Martins Jerónimo, hodi halo enseramentu ba atividade kongressu estraordináriu TLPU iha Delta Nova. (*)

Rate this item
(2 votes)
Last modified on Saturday, 13 November 2021 21:44
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items