Tempotimor (Díli) – Komisaun Organizadora ba loron 4 Setembru, konvida populasaun tomak atu partisipa iha Marsa da Paz, ne'ebé sei hala'o husi Hotel Timor nia oin to'o Sentru Convensoens Díli (CDD).
"Aban, 4 Setembru loron importante. Tanba, iha 4 Setembru 1999 iha minutu sira ne'ebé atu ba to'o tuku sia dadersan povu Timor-Leste laran tomak ho laran taridu hodi hein rezultdu eleisaun 30 Agostu 1999. Iha tuku sia, ita nia belun Ian Martin anunsiu rezultadu Konsulta Populár ne'ebé mai fó manan ba Ukun Rasik An," dehan vise Prezidente Komisaun Organizadora ba eventu 4 Setembru, Juvencio de Jesus Martins iha Sentru Media Palásiu Governu, Tersa (03/09/19).
Liuhosi Press Conference ne'e, Komisaun Organizadora konvida povu tomak, atu partisipa iha Marsa da Paz ne'ebé atu refleta ba rezultadu determinasaun Timor-Leste nian ba Konsulta Populár 1999 liubá.
"Ami konvida maun-alin, inan feton sira, povu iha territóriu Timor-Leste tomak atu ita hamutuk festeza loron ida ne'e, iha ida-idak ninia suku no munisípiu. Ba populasaun iha Kapital Díli, ami konvida atu konsentrasi hotu iha Hotel Timor nia oin, hodi ita halo Marsa da Paz husi Hotel Timor to'o Sentru Konvensoens Díli (CCD)," Juvencio hatete.
Iha komemorasaun loron 4 Setembru ne'e, Komisaun Organizadora ba eventu ne'e mós konvida ona eskola hamutuk 24 iha Díli laran hodi partisipa iha Marsa da Paz ne'e, no estudante sira ne'ebé sei partisipa kuaze atus ida resin inklui Juventude no Populasaun Kapitál Díli.