Lider kharismatiku Kay Rala Xanana Gusmao fui hela bee ba eis Prezidente ZEESM, Dr. Mari Alkatiri ninia ulun durante kampana Prezidensial 2017
Foto Especial
Tempotimor (Díli) – Bankada opozisaun Partidu Demokrátika (PD) iha Parlamentu Nasionál, ezije VIII Governu tenki seriu nomeia Prezidente Rejiaun Administrativu Espesial Oe-Cusse Ambeno (RAEOA) no Zona Espesiál Ekonomia Sosiál Merkadu (ZEESM) Timor-Leste.
"Agora, kbi'it husi Governu Aliansa Mudansa ba Progresu (AMP). Lei iha ona. Ne'ebé ita hein. Klaru ita labele husik lideransa ne'e mamuk hanesan ne'e. Tanba, dezenvolvimentu ne'e la hein lider ida," dehan Deputadu Bankada Demokrátika, Adriano do Nascimento iha Parlamentu Nasionál, Segunda (02/09/19).
Nia dehan, Oe-Cusse presiza lider ida para hodi dezenvolve liután rai ketan ne'e. "Sistema la'o hela. Ne'ebé, ita presiza lider ida para ba ne'e atu halo mudansa di'ak liután iha Oe-Cusse. Mas, lahatene. Kapasidade Governu nian atu hili. Tanba, lei fó dalan, Primeiru Ministru mak nomeia," tenik Adriano.
Tuir deputadu ne'e, lei Prezidente Repúblika promulga ona. Maibé, to'o agora Governu kontinua husik Oe-Cusse mamuk. "Lei, Prezidente Repúblika promulga ona. Mas, tanba saida mak to'o agora seidauk nomeia. Problema buka ema mak la hetan ka oinsá," Adriano subliña.
Antes ne'e, Primeiru Ministru Taur Matan Ruak iha Palásiu Prezidensiál Bairru-pite (15/08/19) katak lei promulga lai mak Governu foin nomeia Prezidente Autoridade foun ba RAEOA-ZEESM. Maibé, to'o agora Governu seidauk nomeia Prezidente RAEOA-ZEESM.
"Seidauk. Tanba lei seidauk promulga tan. Seidauk promulga. Ita seidauk bele ko'alia buat sira ne'e. Mais, to'o tempu ita boot sira (jornalista) sei hatene medida saida mak ami halo ita boot sira sei hatene," dehan Primeiru Ministru Taur Matan Ruak iha Palásiu Prezidensiál Bairru-pite iha momentu ne'ebá.
Tempo Timor
Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.
Jornalista Jornal Tempo Timor, bandu atu hetan envelope ka sasan ruma husi fontes informasaun sira.
www.tempotimor.com
