"Maizomenos iha tinan foun tan, depois tinan foun", dehan PR Lú Olo iha inaugura edifísiu Prokuradór Jerál Repúblika (PJR), Kolmera, kuarta (27/10).

Maibé parte Prezidente Republika Lú Olo rasik seidauk tempu atubele deside rekandidata-an.

"Ha'u seidauk hatete ida ne'e, atu kandidatu ka? la kandidatu. Ida ne'e seidauk to'o tempu para ha'u atu ko'alia", deklara nia.

Antes ne’e, Prezidente Komisaun Nasionál Eleisaun (CNE), José Agostino da Costa Belo hatete, bainhira Prezidente Repúblika dekreta ona kalendáriu eleisaun mak kandidatu sira bele aprezenta sira-nia kandidatura ba Tribunál Rekursu atu bele kompete iha eleisaun presidensiál.

"Bainhira Prezidente Repúblika fó sai ona kalendáriu  eleisaun, sura husi loron ne'e dentru loron 20, kandidatu sira aprezenta ona sira-nia kandidatura ba Tribunál Rekursu (TR). Hafoin Tribunál Rekursu verifika hotu sei lori mós ba CME no STAE halo supervizaun, oinsá kona-ba lista ne'ebé aprezenta no apoiante sira-nia kartaun ne'e loos duni kalae?", nia esplika iha edifísiu CNE Kaikoli, sesta (22/10).

Tuir Konstituisaun Repúblika Demokrátika Atu kontesta ka konkore ba eleisaun Prezidensiál, kandidatu ida tenke iha rekerimentu haat ne’ebé define iha Artigu 75 alínea 1.

Tuir kriteria kandidatura tenke sidadaun orijinál Timor-Leste, tinan mínimu 35, ho kapasidade di'ak no ne'ebé hetan proposta husi sidadaun hili ema na'in mínimu rihun-lima (5.000). (*)