Print this page

KHUNTO-PLP 'Hamaus' Governu Selu Osan Liña Frente

By October 26, 2021 1787
Bandeira PLP ho KHUNTO. Bandeira PLP ho KHUNTO. Foto Tempo Timor

Tempotimor (Dili)-Bankada Kmanek Haburas Unidade Nasionál Timoroan (KHUNTO), no Bankada Partidu Libertasaun Popular (PLP) hahú hamaus hela Governu hodi aselera pagamentu ba servisu liña frente sira.

Deputadu Bankada KHUNTO, Luís Roberto hatete, nia parte sente triste tebes, tanba to'o agora Governu rasik seidauk selu liña frente.

"Ohin PN sei hola responsabilidade fó apresiasaun ba pedidu Prezidente Repúblika, ba Estadu Emerjénsia ba dala-19, maibé ami sente triste oituan waihira Governu seidauk selu ema sira ne'ebé servisu iha frontline, hanesan F-FDTL, PNTL, inklui ita-nia mídia privadu no mídia públiku sira, ne'ebé durante ne'e dedika sira-nia an hodi kombate covid-19 nian”, dehan nia iha plenária PN, segunda (26/10).

Mesmu nune'e, Bankada KHUNTO deside sei dignifika nafatin ekipa Saúde, PNTL, F-FDTL, no Mídia sira hotu, tanba sira mak sai eroi foun tanba ho sira-nia responsabilidade konsege salva povu iha situasaun covid-19 ne'ebé Estadu enfrenta.

Deputadu Bankada Partidu Libertasaun Popular (PLP), Noe da Silva Ximenes "Buka Tuir" hatete, iha diskusaun ba renovasaun deklarasaun Estadu Emerjénsia dala-19 ne'e, parte PLP hakarak rekomenda ba Governu atubele tau atensaun lalais pagamentu ba servisu frontline.

"PLP iha rekomendasaun balu, ne'ebé Governu presiza tau atensaun. Ami-nia rekomendasaun ida mak iha frontline barak mak seidauk selu, nune'e ami husu ba Governu atubele selu ona ita-nia frontline sira ne'ebé mak durante ne'e presta ona sira-nia servisu ba iha sosiedade”, dehan nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items