"Komisaun G desde uluk la taka matan, wainhira sira-nia halerik sira hatutan mai komisau G, momentu ne'eba kedas meza komisaun hola inisiativa haruka imediatamente karta ba MEJD, husu atu rezolve ajente sira ne'ebé hamutuk 93 pesoál ninia halerik. Nune’e mós haree filafali ba kotuk, momentu ne'eba komisaun G halo audénsia rona direta husi eselénsia Ministru MEJD, deklara ba deputadu sira dehan katak sei rezolve situasaun ne'e iha tempu ne’ebé mak besik no badak, maibé la determinadu”, dehan Prezidente Komisaun G, António Verdial iha PN, segunda (25/10).

Maske iha fulan-fevereiru tinan 2021, Ministru Armindo Maia deklara ba Primeiru Ministru (PM), Taur Matan Ruak, bainhira hala'o audénsia katak, rekrutamentu ne'e iha indisiu ba iregularidade.

Maibé, tuir informasaun ne’ebé mak deputadu sira akompaña husi konsellu ministru iha loron 20 setembru 2021, katak konsellu ministru laiha objesaun ba ajente administrativa 93 pesoál.

Tuir loloos Ministru MEJD tenke tau asuntu ida ne'e ho imediatamente atu rezolve situasaun ida ne'e.

Iha ne'e, responsável bankada parlamentar, mós haruka karta ba Prezidente PN, no husu atu Ministru Edukasaun Juventude no Deasportu, atu marka prezensa iha plenária, hodi hatan ba halerik hothotu inklui mós kestaun ajente rekrutadu 93.

Komisaun G mós promete sei halo fiskalizasaun ba Orsamentu Jerál Estadu 2020 no 2021, ne'ebé Parlamentu aprova hodi aloka ba MEJD atu benifisia ajente rekrutadu nain-93. (*)