"Dezenpregu, Govenu ida ne'e aumenta dezenpregu, e la'ós hamenus dezenpregu, aumenta barak liu”, dehan Deputada Bankada Partidu Demokrátiku (PD), Mariano ‘Assanami’ Sabino, iha PN, segunda (25/10).
Tanba, kompaña lubuk ida, sira-nia obra ne'e lala'o, no balun obra la'o hotu ona maibé traballadó sira la selu tanba osan laiha.
"Agora traballadór sira-nia oan sira atu hán hemu, atu eskola, ne'e afeita. Ne'ebé ida ne'e hodi impaktu ida ne'ebé boot tebes ba ema barak”, afirma nia.
Aleinde problema traballadór sira, komisaun D trata asuntu dezenvolvimentu ekonómia deteta Governu rasik dalaruma hapara sira-nia funsionáriu kontratadu sira ne'ebé mak tinan barak servisu iha instituisaun Estadu.
Haree ba situasaun sira ne'e, PD hakarak rekomenda funsaun importante sira ba Governu, presiza mantein fó estabilidade seguransa, defeza, polítiku, no presiza hatene, ninia sasukat kona-ba oinsá hasa'e kresimentu ekonomiku no rendimentu popular ba ema ida-idak.
Governu presiza kria kampu servisu, no planu ida ne'e la'ós Governu mak kria rasik, maibé bele mós fasilita liuhusi kompaña sira atu kria.
"Agora kompaña imvestimentu mós laiha, kompaña rai laran mós o hamate, la selu tán nia, halo nusa mak o nia apoiu ba rekuperasaun ekonómia nian ne'e la'o. E rekuperasaun ekonómia ne'e la'ós fahe osan de'it iha leten, arbiru”, hatete nia. (*)
