"Ohin delegasaun ida husi Bruceles, Uniaun Europea mai hala'o mós misaun hanesan, hasoru STAE. Objetivu mai halo asesmentu ba ita-ninia prosesu preparativu eleisaun prezidente ne’ebé mak sei mai”, dehan Diretór Jerál STAE, Acilino Manuel Branco iha knar fatin STAE, sesta (22/10).
Tanba eleisaun ne'e, asuntu ida ne'ebé mak importante nomós hetan atensaun husi mundu, iha situasaun pandemia covid-19, atu nune'e bele garantia preparasaun ida ne’ebé seguru, ba sidadaun eleitór sira, enbora iha covid-19 maibé bele ezerse sira-nia diretu votu.
"Iha esperensaun eleisaun ba kotuk sira mós mobiliza observadór internasionál sira, lori mai halo observasaun ke depois sira mós halo rekomendasaun sira ba ita-ninia entidade estadu ninian”, dehan nia.
Iha ne'e, delegasaun UE sira mós rona aprezentasaun balun husi STAE, no bainhira remata sira sei halo rekomendasaun balun kona-bá Timor-Leste nia preparasaun eleisaun iha futuru, liliu bele mobiliza organizadór Internasionál sira, ne'ebé mak sei mai halo observasaun ba prosesu eleitorál, oinsá bele kontribui ba krebilidade, intergridade no taransparánsia husi prosesu eleitorál ne'e.
Dadauk delegasuan husi Nova Iorke mós fó rekomendasaun balun ba orgaun eleitorál atu mantein prosesu eleitorál ida di'ak iha parante nasional no Internasionál.
Enkuantu pozisaun STAE espera katak mesmu ho situasaun Covid-19, maibé Timor-Leste iha maneira oioin atu kontinua organiza eleisaun sira iha futuru bele la’o ho susesu. (*)