"Ohin, Governu Timor-Leste konklui ona prosesu rejime tranjitoriu, entaun iha ona nesesidade para tama ona ba iha ein vigor iha 30 Agostu 2019, kona-ba tratadu entre Repúblika Demokratika Timor-Leste no Austrália ne'ebé estabelese ita nia fronteira marítima no Tasi Timor nian," dehan Agio Pereira iha hotel Novo Turizmu, Kuarta (28/08/19).
Nia dehan, liu tiha periodu ida hodi halo konsultasaun no negosiasaun ne'ebé hahú husi asinatura ba tratadu iha Marsu 2018 nian ne'ebe agora iha.
"Governu TL asina tan kontratu foun lima kona-ba fahe produsaun ho empreza sira ne'ebé afetadu husi tratadu Petroleu no Gas. Atu garantia ba estabilidade no seguransa ba operasaun offshore iha Tasi Timor, durante periodu tranzisaun nian ba tratadu Tasi Timor no tratadu fronteira marítima foun," tenik Agio.
Alende ne'e, Governu TL mós asina tan akordu foun ho Governu Austrália kona-ba troka informasaun fiskais nian entre Timor-Leste ho Austrália no iha memorandum entendimentu rua entre instituisoens ne'ebé estadu permite kooperasaun iha materia petroleu, espesifikamente ba jestaun ba oleodutu Bayu Undan, kona-ba tranferensia dadus jeolojikus.
"Asinatura kontratu lima no akordu ho Governu Austrália ne'e, faz parte husi kondisaun nesesidade nian ba troka nota diplomatika Timor-Leste ho Austrália, ne'ebé kompleta ona prosesu rejime tranjitoriu no permite ona, hodi tama ba ein vigor tratadu fronteira iha loron 30 Agostu 2019," Agio afirma.