"Horisehik (18/10) kalan, ita-nia diresaun sira iha Aportil hatete katak Ró ne'e seidauk bele mai iha ne'e tanba Governu seidauk selu”, dehan nia iha plenária PN, tersa (19/10).
Tanba informasaun ne'ebé mak CNRT simu husi Autoridade Purtuáriu Timor-Leste, institutu Públiku (APORTIL.ip) katak, Ró Berlin Ramelau dadaun ne'e seidauk bele lori mai tanba Governu seidauk selu hotu.
Ba asuntu ne'e, Pozisaun CNRT dúvida tanba Ministériu Transporte no komunikasaun rasik deklara tiha ona iha fulan kotuk ba, dehan Ró Berlin Ramelau iha ona prosesu atu lori mai Timor-Leste fulan-setembru nia laran, Maibé realidade la akontese.
Ho ida ne'e, Bankada CNRT sente preokupa, bainhira Ró ne'e kontinua la mai, ida ne'e sei difikulta povu Ataúro ho Rejiaun Administrativa Espesial Oekusi Ambeno (RAEOA) atu hala'o viajen ba mai.
Husu ba Governu atu buka mekanizmu no maneira oinsá rezolve situasaun ida ne'e, nune'e labele kontinua hela ho kondisaun ida ne'e.
Deptada Bankada FRETILIN, Fabião de Oliveira husu, Governu di'ak liu buka maneira atu koordena malu ho Indonézia nune'e bele autoriza hikas transporte públiku hanesan travel hodi hala'o hikas viajen ba Oekussi liuhusi Kupan-Indonézia.
"Fó hanoin filafali ba Governu atu buka dalan oinsá, atu kordena transporte terestre ho Indonézia, atu trevel bele la'o filafali husi Dili ba iha Oekussi”, dehan nia.
Tanba dadaun ne'e populasun atono preokupa tebes atu viajen ba Oekussi hodi bele akompaña loron-boot finadu ne'ebé monu iha loron 2 fulan-novembru tinan 2021.(*)