Sekretária Komisaun B deputada, Elvina Souza hatete, nia parte apresia deputada Olinda Guterres levanta preokupasaun PNTL nian maibé husu atu deputada ne'e labele repeta ejizensia refere iha futuru.

"Atu hatan ba distinta deputada Olinda ne'ebé hamenon hela liamenon ba komisaun B. Ami apresia tebes señora deputada nia hanoin maibé iha futuru sé bele ita ko'alia kona-ba asuntu seguransa ne'e labele lekar sai hanesan ohin ne'e”, dehan nia iha plenária Parlamentu Nasionál PN, segunda (18/10).

Iha intervensaun Xefe Bankada KHUNTO, Olinda Guterres hatete, nia parte konfuzaun ho fardamentu PNTL ho F-FDTL, tanba farda ne'ebé sira uza agora dadauk mosu kor oioin, inklui sapatu talin mós kor oioin. Tanba ne'e, Governu tenke buka atu uniforman kestaun fardamentu ba sira.

Maibé, Komisaun B nuudar trata asuntu defeza no seguransa durante halo fiskalizasaun ba servisu PNTL nian, nunka lekar sai asuntu sira hanesan ne'e iha plenária laran, tanba konsidera situasaun seguransa ne'e sensivél no la merese atu fó sai ba liur.

Xefe Bankada KHUNTO, Olinda Guterres hatete, kestaun ne'ebé nia ko'alia ne'e la'ós atu apoiu grupu ida nian, maibé kaundu haree ho matan kestaun estadu, nu’udar reprezentante povu tenke ko'alia no laiha ema ida mak bandu.

"Hau mai iha ne'e la'ós atu apoiu se sé, maibé ha'u haree ho matan kuandu buat ne'ebé hau foti?, e ha'u foti, laiha ema ida bandu dehan katak ha'u labele foti. Babain kedas ha'u hatete dehan ha'u-nia matenek la to'o ita-boot sira, kuandu ha'u haree ita-nia ema oinsá ha'u tenke foti, bele ga labele”, dehan nia. (*)