Print this page

PN 'Hakarak' Povu Akompaña Debate OJE 2022

By October 15, 2021 1296
Prezidente Parlamentu Nasionál (PN), Aniceto Longuinhos Guterres Lopes. Prezidente Parlamentu Nasionál (PN), Aniceto Longuinhos Guterres Lopes. Foto Tempo Timor

Tempotimor (Dili)-Prezidente Parlamentu Nasionál (PN), Aniceto Longuinhos Guterres Lopes, hakarak povu akompaña diskusaun proposta-Lei Orsamentu Jerál Estadu (OJE) tinan fiskál 2022, tanba ne'e liga ba moris di'ak ba povu nian.

"Orsamentu Jerál Estadu ne'e liga ba moris Estadu, moris povu tomak ninian, e hothotu iha diretu atu akompaña. Agora ho aprezentasaun ida ne'e bele akompaña dadauk ona”, dehan Aniceto hafoin simu proposta-Lei OJE 2022 ne'ebé aprezenta husi Governu iha sala konferénsia Líder Bankada, Parlamentu Nasionál, sesta (15/10).

Tanba proposta-Lei OJE ne'e dadaun Governu aprezenta ona ba Parlamentu Nasionál atu prepara ba diskusaun no aprovasun iha plenária.

Bainhira hala'o diskusaun no aprovasaun iha plenária, Parlamentu Nasional mós sei halo transmisaun direta ba povu no ba sidadaun hothotu atubele akompaña, no laiha buat ida ne'ebé mak Estadu atu subar ba públiku.

Ministru Finansa, Rui Gomes, konsidera orsamentu jerál estadu 2022 ne'e importante, tanba nia hanesan instrumentu husi polítika fiskál ida ne'ebé tenta atu istimula kresimentu ekonómiku no hadi'a kondisaun balun ne'ebé akontese iha rai laran.

Tanba, iha tinan 2020 ne'e, Timor-Leste hetan kontraun ekonómika ida ne'ebé boot pursentu 8,6. Enkuantu iha tinan 2021 ne'e atinje de'it pursentu 1.6 tanba impede husi regra konfinamentu nomós ezekusaun orsamentu ne'ebé fraku oituan.

Maske nune'e Governu agradese tanba ida ne'e kresimentu ida ne'ebé pozitivu maske husi baze ida ne'ebé menus.

Nune'e proposta-Lei OJE 2022 ne'ebé entrega ho eletrónika ba Parlamentu Nasionál ne'e, Ministériu Finansa mós sei lansa diretamente iha sité hodi bele garante transparánsia ba ema no públiku tomak atu asesu no kompriende lala'ok iha OJE 2022. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items