"Tetu OJE 2020 nian, SEFOPE hetan distribuisaun pakote orsamentu hamutuk milioens $ 5.654.426. Ida ne'e sei fahe ba salariu no vensimentu milioens $ 1.4, bens no servisu milioens $ 2.5 ho tranferensia públiku milioens $ 1.6 inklui orsamentu konsolidadu ne'ebé distribui mai iha SEFOPE," dehan Diretor Nasional Administrasaun no Finansas (DNAF), Mateus Wilfredos dos Santos Tallo iha edifisiu SEFOPE, Kaikoli,Tersa (27/08/2019).
Diretor ne'e mós akresenta, kada diresaun sira ne'ebé iha, depende ba programa sira hafoin aloka orsamentu.
"Kada diresaun sira bazeia ba nia programa no atividade, tanba distribuisaun orsamentu nia sasukat mak ami haree ba prioridade programa ba kada diresaun nian, no programa ne'e liuliu liga ba área formasaun, empregu no traballu, nomos iha área jestaun no servisu jestaun iha desentralizasaun nian," nia haktuir
Diretór ne'e mós esplika katak, kada diresaun sira iha SEFOPE atu tau osan ba haree mós ba kapasidade ezekusaun orsamentu ba tinan interior nian.
"Kada diresaun sira, ami mós haree ba kapasidade ezekusaun orsamentu iha tinan interior nian. Se ezekuta tuir regras ne'e sei aumenta. Maibé, ezekuta la tuir regras ne'e orsamentu bele menus. Tanba, orsamentu atu hasa'e no hatún ne'e bazeia ba regras," tenik Mateus.
Nia afirma liután, polítika Governu daualu nian iha SEFOPE nia parte mak fó formasaun. Tanba ne'e, mak tau orsamentu boot liu ba área formasaun, tuir fali mak área empregu no traballu.