Programa lima ne'ebé Governu atu fornese ba RTTL,ep hanesan, Programa Governu Ko'alia, inspirativu, profile munisípiu, jornada FALINTIL, no programa haree rasik.

“Fundamentu husi akordu MAPKomS ho RTTL ne'e nu'udar akordu entre parte rua ne'e fasilita atividade hothotu, liuliu iha atividade Governu nia ne'ebé mak presiza on air iha RTTL,ep, entaun ne'e presiza akordu ida atubele regulariza parte rua ne'e nia devér, halo nusa mak halo servisu di'ak liu e oinsá mak bele atinje objetivu ne'ebé mak parte rua hakarak”, dehan Ministru Francisco, bainhira asina akordu ho Prezidente RTTL,ep, José Antonio Belo ‘Taraleu’, iha Palásiu Governu, kinta (14/10).

Tanba tinan 2022 tama ona ba tinan polítiku tinan ne'ebé mak eleisaun prezidensiál ninia no ba tinan 2023 eleisaun Parlamentar.

“Entaun RTTL,ep ne'e agora ami prepara hela kondisaun atu ezerse nia funsaun ho di'ak atu nune'e nia mós bele hala'o kna’ar sira ne'e la'ós iha de’it Dili laran, maibé to’o mós iha Munisípiu no suku, nune'e komunidade bele akompaña didi’ak oinsá mak tinan polítiku ne'e bele susesu iha Timor-Leste”, afirma nia.

Prezidente Konsellu Administrasaun RTTL,ep, José Antonio Belo hatete, akordu ne'e nu'udar outsource ba programa lima ne'ebé Governu produz hodi ense konteudu iha RTTL.

"Ida ne'e hanesan outsource ida, depois de faz parte ida que programa lima, husi parte Governu nia produz, hodi bele ba enriquesa konteudu balun iha RTTL”, dehan nia.

Entaun konteudu sira ne'ebé Governu halo ne'e promove liu atividade ne'ebé mak relevante ba Governu nia, no programa sira ne'e mak Governu ninia parte, konteudu tomak ne'e resposável Governu ninia.

“Ne'e ita mós kontribui liuhusi kanál ne'ebé mak ita iha maske iha menus buat balun maibé ita nafatin halo ita-nia kna’ar”, esplika nia. (*)