“Ha'u liga ba liña internet, ita hatene katak prezensa kompaña telkomunikasaun tolu iha Timor-Leste, fulan ida resin ona atu tama fulan-rua, liña internet ne'e la di'ak. Iha semana kotuk ha’u konsidera hanesan korrupsaun tanbasá, US$1 kada konsumidór sira ne'ebé mak durante ne'e enxe halo pakote, maibé rede la di'ak”, dehan deputadu Bankada FRETILIN, Marito Fatubai Mota, iha plenária PN, tersa (12/10).
Bankada Fretilin mós nota kompaña telkomunikasaun hirak ne'e fulan-ida resin ona oferese de'it rede internet la kualidade maibé Autoridade Nacional Comunicação (ANC) seidauk fó razaun ruma.
"Tanbasá mak rede ho liña ne'e laiha, hodi bele garantia konsumidores sira ne'ebé mak durante ne'e lakon osan pulsa lor-loron maibé rede ne'e la di'ak”, afirma nia.
Tanba ne'e husu Governu liuhusi Ministru Asuntu Parlamentar no Komunikasun Sosiál, Francisco Jerónimo, atu hatuka hela preokupasaun ne'e ba Ministériu Transporte no Komunikasaun (MTK) hodi buka solusaun.
Parte seluk husu mós Governu atu forse sertifikadu ba empreza telekomunikasaun ne'ebe hari’i husi sidadaun Timoroan atubele kompete ho kompaña telekomunikasaun internasionál hanesan Telemor, Timor Telecom no Telkomsel.
"Ha’u-nia preokupasaun, e ikus ne'e señor ministru, ha'u rona ona katak iha empreza telkomunikasaun timoroan, ne'ebé mak rejistu ona, e sira kompleta ona sira-nia rekejitu, maibé ate adata Governu seidauk sertifika sira, e sira hein sertifikadu. Tanba sira mós hakarak kompete ho kompaña internasionál boot tolu ne'ebé liga ba liña telkomunikasaun ne'e”, hatete nia. (*)