“Ami mós hanoin katak tempu ona atu ita labele eleje kandidatura husi partidu, tanba automatikamente nia sei foti dezisaun barak mak inklina iha partidu eh grupu balun tuir nia gostu no hakarak no haluha tiha interese-komum, sira ne'ebé iha demokrasia nia laran no tau perigu ba iha ita-nia Konstituisaun RDTL”, dehan Koordenadór Grupu Juventude Munisípiu Covalima, Atanácio Afonso, iha Restaurante Benefica-Dili, kinta (07/10).
Haree ba eleisaun prezidénsia ne'ebé realiza iha tinan 2022, mak Sidadaun hothotu sei ezerse sira-nia direitu ba votu konfiansa ba figura ida ne'ebé iha duni kapasidade atubele reprezenta Timor-Letse nu’udar xefe Estadu ka Prezidente Repúblika, tuir konstituisaun RDTL artigu 75.
Ho ida ne'e, Grupu Joventude Munisípiu Covalima, hakarak manifesta no apoiu ba espoza Primeiru Ministru, Isabel da Costa Ferreira, atu kandidata-an ba Prezidente Repúblika períodu 2022 - 2027.
Tanba tempu to'o ona, atu prezidente repúblika tenke ema ne'ebé iha kapasidade no independente nune'e respira anin foun hodi lori hikas esperansa foun ba timoroam tomak.
“Tempu to'o ona atu ita husik kostume aat ida ne'e, ita lebele halo promesa falsu mak barak wainhira iha tempu kampaña, ita presiza líder ida ne'ebė iha espíritu lideransa ne'ebé mak iha valór no prinsípiu ba ema hotu nia di'ak, lideransa ida ne'ebé bele hadi'ak problema hothotu iha setór sosiál”, afirma nia.
Ho Ida ne’e, husu atensaun ba povu tomak atu dehan 'la’e' ba líder ne'ebé ko'alia de'it ho ibun kona-bá liberdade, karidade, esperansa, prosperidade, no ikus la tau iha prátika.
“Ikus liu ami hakilar ho lian maka’as hodi husu, Juventude sira hotu, família sira hotu iha Timor laran tomak, mai ita hamutuk hodi enkoraja Dra. Isabel da Costa Ferreira ho kompromisu furak ida, mehi furak ida, fó apoiu ba ita-nia Kandidatura feto maluk Dra. Isabel da Costa Ferreira ba PR”, deklara nia.
Pozisaun Covalimaoan garante katak kandidatu Isabel da Costa Ferreira hanesan figura ida ne'ebé mak bele responde kestaun hotu iha situasaun ne'ebé Timor-Leste hasoru. (*)
