Tempotimor (Díli) – Deskonfia, mosu prosesu naksala ba tenderizasaun ho númeru ICB G19/MAF/DNA/ICB/CA002 kona-ba sosa farda hodi suporta atividade resenseamentu agrikola ho nia folin  kontratu USD 345,860.00.

 

Diresaun Nasionál Aprovizionamentu (DNA), Ministériu Agrikultura no Peskas (MAP) publika rezultadu tender ne’e liuhosi publisidade iha média elektróniku no imprime iha loron 24 Jullu 2019. Rezultadu tender ne'e sertifika no aprova kompañia Rocely Unipessoál, Lda sai nu’udar manan nain ba tender fornese farda ba atividade resenseamentu agrikola, ho nia folin kontratu USD 345,860.00.

 

Hafoin DNA-MAP fó sai rezultadu tender ne’e, bazeia ba surat reklamasaun ne’ebé redasaun Tempotimor.com hetan asesu katak kompañia ualu (8) ne’ebé tuir no lakon iha konkursu ne’e, hato’o kedas karta protesta ida ba iha Sekretáriu Jerál  MAP, Cesar José da Cruz hodi kestiona rezultadu tender ne’e. Tanba tuir empreza sira ne’e katak, iha loron 30 Maiu 2019, kompañia East Venture Partners, Lda submete mós nia proposta ba tender ne’e, hamutuk kompañia 16 mak tuir konkursu ne’e. Maibé, ikus mai kompañia Rocely Unipessoál, Lda mak passa no kumpri rekezitu hotu iha faze preliminariu.  

 

Surat reklamasaun ne’e mós hatutan, bazeia ba rezultadu Avaliasaun Teknika Proposta ne’ebé fó sai iha loron 17 Juñu 2019, hatudu kompañia East Venture Partners, Lda mak liu nafatin no kontinua hakat ba etapa loke Proposta Finansial hodi kontinua hatudu kompañia East Venture Partners, Lda mak okupa fatin dahuluk, no kompañia Rocely Unipessoal Lda okupa fatin danen (VI) nian. Maibé, infelizmente kompañia East Venture Partners, Lda mak lakon iha konkursu ne’e rasik.

 

Tabela rezultadu loke Proposta Finansial:

No. Naran Kompañia Valor Osan

1. East Venture Partners, Lda USD $ 321,840

2. Tuklira Unip, Lda USD $ 324,550

3. ZECMARCO Unip, Lda USD $ 339,987

4. Central Yurico Unip, Lda USD $ 340,500

5. Quatro Centos Unip, Lda USD $ 342,720

6. ROCELY Unip, Lda USD $ 345,860

7. Marlvi Unip, Lda USD $ 354,155

8. Cornel Unip, Lda USD $ 354,300

9. LOSUSA Unip, Lda USD $ 355,450

 

“Kompañia East Venture Partners, Lda la satisfas ho rezultadu ne’ebé fó sai, ne’ebé mak manan nain kompañia ROCELY (bazeia ba Proposta Finansial ROCELY iha número 6),” esplika surat reklamasaun ne’ebé asina hosi diretor kompañia East Venture Partners, Lda, Leonel Ramalho Lopes. 

 

Diretor Leonel iha nia surat reklamasaun ne’e mós husu ba MAP atu atende assuntu ne’e ho seriedade. 

 

“Ami husu ba Ministériu Agrikultura no Peskas atu pendente lai kontratu ba kompañia ROCELY no rezolve lai assuntu ne’e ho esplikasaun klaru mai kompañia East Venture Partners, Lda. Tanba, tuir Leonel haree buat balun la loos iha prosesu ida ne’e,” deskonfia Leonel iha nia surat reklamasaun iha pajina 2.

 

Karta reklamasaun ne’ebé asina hosi kompañia 8 ne’e deklara, sira prontu atu sai sasin ba prosesu oin mai. Karta ne’e hato’o mós ba Ministru Agrikultura no Peskas, Komisaun Anti Korrupsaun (KAK), Ministériu Públiku, Advogadu kompañia East Venture Partners, Lda no Provedoria Direitu Humanu no Justisa (PDHJ).

 

Hatan kona-ba alegasaun ne’e, Ministru Agrikultura no Peska (MAP), Joaquim José Gusmão dos Reis Martins katak, alegasaun sira hanesan ne’e normál. “Tanba iha tender ne’e kompañia hotu hatama ba kompete iha prosesu no fó tempu loron lima (5) atu bele hato’o karta protesta se la satisfas karik? Ida ne’e normal. Depois hatama mós karta ba asesor juridiku sira hodi haree, sira hare hotu tiha, hatan filafali ba karta protesta ne’ebé mak iha. Ne’e normal. 

 

Governante ne’e katak, durante prosesu tomak nia la halo intervensaun ba parte aprovizionamentu nia serbisu.

 

Nia dehan, konfiansa tomak nia fó ona ba ninia funsionáriu sira, ne’ebé serbisu iha diresaun finansa no aprovisionamentu, hodi sira bele hala’o serbisu. Laiha presaun, hodi tuir de’it lei aprovizionamentu ne’ebé mak iha.

 

 “Ha’u tau ha’u nia konfiansa hotu ba ha’u nia staff sira. Komesa hosi aprovisionamentu, finansas no juri sira. Sira mak hatene liu ba buat ne’e. Ha’u ne’e polítiku. Ha’u asegura polítika. Teknikamente iha aprovisionamentu. Ha’u labele mete to’o iha kraik ne'ebá,” Joaquim hatete ba tempotimor.comiha Palásiu Governu, Kuarta (14/08). 

 

Karik, aban bainrua mak mosu problema kona-ba rezultadu tenderizasaun ne’e? 

 

“Ha’u nunka mete prosesu iha tenderizasaun ne’e. Ha’u fó ba sira, no sira hala’o. Ha’u asinatura ne’e ikus liu. Tanba, se ha’u to’o ba kraik ne'ebá, ne’e ha’u serbisu barak liu fali ona. Tanba ne’e, mak ita fó konfiansa tomak hodi hala’o serbisu ne’e,” nia esplika.