"Sentru votasaun ita identifika 1200, estasaun 1500 ne'ebé mak identifikadu, e lojístikamente  preparadu tuir númeru ne'ebé mak iha para ba eleisaun prezidente ninian. Ne'ebé ida ne'e ita sei tetu, mais tuir lei katak, núminu Suku ida iha sentru votasaun ida. Agora, ita iha 452 Sukus, agora ita iha ona 1200, siknifika iha suku balu que nia sentru votasaun ne'e liu ida ka rua”, hatete Diretór Jerál STAE, Acilino Branco, iha kna'ar fatin Kaikoli, kinta (30/09).

Enkuantu, kona-ba Sentru Votasaun Paralelu tolu ne'e, tanba tuir lei sei instala de'it iha Dili, atu fasilita eleitór sira ne'ebé laiha posibilidade atu fila ba sira-nia munisípiu, postu administrativu no suku sira, hodi tuir votasaun.

“Ami identifika tiha ona, sentru ida pode ser iha eskola téknika Bekora, provizóriu, ida parese iha eis keuangan Kaikoli ninian ne'e, entre iha Dili Oeste, mak pode ser iha edifísiu ida Akadémia polísia nian sorin, agora Arte Moris ne'e, ho INAP (Institutu Nasionál ba Administrasaun Públika). Entre tolu ne'e mak sei posivelmente sei sai nu'udár sentru paralelu iha Kapitál Dili. Maibé, sira ne'e hotu iha hela planu”, dehan nia.

Ba eleitór sira ne'ebé sofre moras husi munisípiu mai halo tratamentu saúde iha Dili, no estudante sira ne'ebé laiha biban ka ho razaun espesifíku seluk ruma atu la ba sira-nia munisípiu, bele tuir votasaun iha sentru paralelu hirak ne'ebé STAE estabelese.

"Sentru votasaun paralelu, ne'e tuir lei, sei estabelese iha Dili. Agora, sentru votasaun paralelu ne'e, inklui mós ona iha 1200 sentru votasaun ne'e. Maibé, iha Dili de'it”, haktenik nia.

Maske nune'e, ninia funsionamentu ne'e sira sei halo hela diskusaun lori aprova iha dekretu Governu, tanba la'ós ema hothotu sei ba ezerse sira nia direitu votu iha sentru votasaun paralelu. (*)