“Prezidente Repúblika hato’o profundas kondolénsias ba família enlutada, Sra. Teresinha Viegas ho nia oan sira, ba família tomak nomós família boot rezisténsia nian", dehan PR Lú Olo liuhusi komunikadu imprensa ne'ebé www.tempotimor.com asesu, sábadu (25/09).

Iha loron 24 setembru, Timor-Leste lakon tan  asua’in luta libertasaun nasionál espesiál ida. Ma’huno bolu hanesan asua’in espesiál tanba halo parte jerasaun fundadór movimentu ba Ukun rasik-an dahuluk ho ámbitu nasionál.

Ho naran asua’in, Ma’huno Bulerek Karathayano, tama iha istória luta libertasaun Patria, nu’udar Fundadór ASDT, membru Comite Central Fretilin, Chefe Conselho Político Militár Frente Armada, Secretário da Comissão Diretiva da Fretilin, Comandante das FALINTIL, Secretario Região 3, lider ida ne’ebé inspira no sai belun boot ba foinsa’e klandestinu sira iha vila laran, iha Timor-Leste no iha Indonézia.

Iha periódu susar tebes, hafoin  militár Indonézia kaer Comandante Superior Luta, Xanana Gusmão, iha 1992, ema barak hanoin luta to’o ona nia rohan. Maibé Ma‘Huno assume lideransa rezisténsia nian no funu kontinua.

Fulan-marsu 1993, forsa okupante kaer líder ne’e no hatama iha kadeia. Maibé la hamate ninia espíritu nasionalista.

Iha vila, Ma’huno serbisu hamutuk ho Ma’hodu kontinua mobiliza juventude sira iha luta hasoru okupasaun Indonézia. Ma'huno esforsa ba hametin rezisténsia iha zona okupada no nune’e kontribui ba   luta klandestina sai mós frente prinsipál ida ba Timor-Leste nia independénsia.

“Ma’huno nu’udar jerasaun fundadór husik ona ita. Triste tebes tanba ita lakon ita-nia líder boot ida.  Maibé ita hotu sei la haluha katak nia husik memória ba ita-nia Timor-Leste livre no independente. Ma’huno nia obra sei hela rohan-laek bainhira valór no prinsípiu luta nian kontinua buras hamutuk ho ita, iha ita-nia moris loroloron ninian”, afirma Lú Olo. (*)