Deputada CNRT, Maria Fernanda Lai, husu Governu liliu Ministériu Solidaridade Sosiál no Inkluzaun (MSSI) atubele kontrola kestaun kartaun ne'e ho sériu.
"Husu ba komisaun kompetente Ministériu Solidaridade Sosiál atu haree ba númeru serie kartaun hodi bele kontrola. Se ita haree ita-nia kartaun laiha númeru serie tanba ide ne'e mak ema falsifika bara-barak. Husu atensaun ita-nian", dehan nia iha Plenária PN, tersa (21/09).
Tanba, CNRT haree katak kartaun vasina ne'ebé Governu oferese ba ema, durante ne'e laiha sèriu, foin lalais deteta iha públiku katak, ema balun la vasina mós hetan kartaun vasina.
Deputada Bankada Partidu Demokrátiku (PD), Elvina Sousa konsidera, atetude sidadaun hodi falsifika dokumentu estadu nian ne'e kontra lei.
"Pior liu kuandu asaun falsifikasaun ba dokumentu estadu nian ne'ebé mak iha implikasaun ba saúde públiku, ha’u hanoin ne'e sériu tebes”, dehan nia iha PN, kuarta (22/09).
Tanba ne'e, husu ba Ministériu relavante atu haree no buka meiu haree didi'ak, tanba dala-ruma mós impaktu husi númeru seguransa iha kartaun vasinasaun ne'e laiha. (*)