"Presiza Partidu tolu ne'e tenke hamutuk, koopera malu liña koordenasaun, atu nune'e buat hotu la'o ho di'ak, para ita bele haree dezenvolvimentu di'ak ba ita-nia povu presiza. Ita hotu kria ambiente ne'ebé di'ak, atu nune'e ita hothotu bele haree programa ida ne'ebé mak Governu nian atu mai iha Parlamentu karik, la'o ultrapasa ho di'ak", dehan nia hafoin audénsia ho Prezidente Parlamentu Nasionál (PN), Aniceto Longuinhos Guterres Lopes iha PN, kinta (23/09).

Tanba ne'e, iha loron kinta (23/9), Konselleiru Másimu Partidu KHUNTO, Naimori Bucar deside hala'o vizita no audénsia ho Prezidente Parlamentu Nasionál (PN), Aniceto Longuinhos Guterres Lopes hodi ko'alia kona-bá oinsá atu hametin plataforma entre partidu Fretilin, PLP no KHUNTO.

 "Sim, vizita ida ne'e, vizita ida ne'ebé mak atu hametin liután plataforma partidu tolu ninian, durante mandatu oitavu Governu nian, husi Partidu Fretilin, PLP, KHUNTO, oinsá atu haree ba oin, atubele haree ita-nia orsamentu jerál ba oin atu di'ak liu-tán", esplika nia.

Partidu tolu ne'e presiza Unidade oinsá haree ba futuru ne'e di'ak liután, la'ós ida-idak la'o ninian, maibé partidu tolu ne'e tenke hamutuk, servisu hamutuk, hodi bele haree buat ida ne'ebé onestu no di'ak ba povu. (*)