Tempotimor (Dili) – Prezidente Tribunál Rekursu (TR), Deolindo dos Santos hatete, Tribunál Rekursu sei deside pakote lei Atividade Petrolifeira (AP) no Fundu Petrolifeira (FP) iha loron 20 nia laran.
Prezidente Repúblika, Francisco Guterres Lú Olo fó ona ba Tribunál Rekursu pakote lei AP no FP, atu halo fiskalizasaun ba nia konstitusionalidade.
"Sesta semana kotuk, ha'u rasik notifika ona Parlamentu Nasionál, na pesoa Prezidente Parlamentu Nasionál (PPN) depois notifika mós Prokuradór Jerál Repúblika (PJR) atu fó sira-nia pareser. Prazu sei termina iha Segunda semana oin. Nune'e, Tribunál Rekursu bele deside. Tantu, resposta ne'ebé horseik tama, horseik tama ne'e bele akontese," hatete Deolindo iha Fatuhada, Tersa (20/08/19).
Lider judisiariu ne'e afirma, kona-ba loron ne'ebé atu deside tuir lei iha loron 25 nia laran. Maibé, konstitusaun RDTL mós fó dalan para reduz.
"Prazu ne'ebé ha'u deside ne'e tuir Konstituisaun loron 25 nia laran. Mas, konstituisaun rasik loke dalan ba Prezidente Repúblika bele reduz prazu. Iha kazu ida ne'e, PR reduz tiha prazu husi loron 25 ba fali loron 20 nia laran. Signifika, tempu ne'ebé TR atu deside tenke maximu iha loron 20 nia laran," dehan PTR
Maski nune'e, Deolindo lakohi halo komentariu ba konteudu ba pakote lei Atividade Petrolifeira no Fundu Petrolifeira nian, ne'ebé PR hato'o ba TR. Nia dehan, tanba bele afeta ba desizaun tribunál nian, iha tempu ne'ebé tribunál deside destinu pakote lei ne'e.