"Intermus de ekipamentu ne'ebé WFP entrega ba MAPKomS, hafoin MAPKomS entrega ba RTTL, EP mak hanesan laptop iha 10, Printer iha 4, no ekipamentu ida ne'e la'ós barak liu maibé bele fasilita ona serbisu iha ne'ebá no bele ajuda ona jornalista sira nia servisu”, dehan Diretór Nasionál WFP iha TL, Dageng Liu, hafoin entrega ekipamentu iha Gabinete MAPKomS, tersa (21/09).

Orsamentu ne'ebé sosa ba ekipamentu hirak ne'e hamutuk rihun 16 ba leten, no ida ne'e hanesan buat kiik ne'ebé mak oferese dahuluk, maibé importánte mak oinsá atu serbisu hamutuk di'ak liután iha futuru, no halo advokasia nomós fahe informasaun no mensajen ba intermus de parte nutrisaun nia.

Ministru Asuntu Parlamentár no Komunikasaun Sosiál (MAPKomS ), Francisco Martins Jerónimo, agradese ba apoia ekipamentu husi WFP ne'ebé oferese ba RTTL, tanba bele fasilita no hakma’an serbisu jornalista sira-nia, no oinsá bele fó informasaun ba inan no labarik sira iha territóriu tomak relasiona ho nutrisaun

"Agradese wain tebes ba ekipamentu hirak ne'e, tanba ida ne'e hanesan kooperasaun dahuluk nia entre WFP ho mídia atu serbisu hamutuk di'ak liután iha futuru, no ida ne'e mós meios ida ne'ebé bele fó sai informasaun kona-ba programa merenda eskolar nia no nutrisaun di'ak bá inan no labarik no família sira iha territóriu tomak”, dehan nia.

Tanba labarik sira presiza tebes nutrisaun no oinsá  Timor-Leste bele hamenus má nutrisaun, entaun buat sira ne’e hotu sai programa WFP nian.

Prezidente Konsellu Administrasaun RTTL,ep, José António Belo 'Taraleu', mós agradese ba WFP tanba bele oferese ona ekipamentu hodi ajuda no hakma’an jornalista sira-nia serbisu.

"Agradese wain ba WFP ne'ebé oferese ekipamentu mai ami, hodi bele fasilita RTTL,ep atu halo servisu, tanba hanesan ita hotu hatene foin lalais iha 4 Abríl inundasaun ne'e iha Kaikoli ita-nia edifísiu sofre boot, no sasán barak mak hetan estragu, no ekipamentu ida ne'e bele tulun ona ita, la'ós buat hotu mak ne'e ona maibé bele hakma’an ona ita-nia servisu iha RTTL no bele fasilita jornalista sira hodi halao sira-nia servisu”, dehan nia. (*)