Print this page

PN Moe Governu 'Atraza' Selu Subsídiu ba Liña Frente

By September 20, 2021 3158
Emblema Parlamentu Nasional. Emblema Parlamentu Nasional. Foto Suplay

Tempotimor (Dili)-Xefe Bankada Kmanek Haburas Unidade Nasionál Timor Oan (KHUNTO) iha Parlamentu Nasionál (PN), Deputada Olinda Guterres, sente moe ho servisu Governu atraza halo pagamentu subsidíu ba pesoál liña frente sira.

"Segundu, Señor Ministru Asuntu Parlamentar no Komunikasaun Sosiál (MAPKOMS), ha’u haree ne'e ha’u mak sente moe fali, ha’u sente moe tebes, lahatene kolega deputadu sira maibé ha’u sente moe, kuandu iha ona plenária, ami sempre hasa'e liña frente ninia osan ne'ebé sira seidauk simu to'o agora”, dehan nia iha plenária PN, segunda (20/09).

Durante iha pandemia, deputadu sira ba observa , pesoál Polísia ne'ebé  halo serguransa iha liña frente, sira sakrifika-an, bele ema laiha mós sira tur nafatin iha hela loron manas laran.

Tanba ne'e ejize Governu tenke aselera ona subsídiu ba pesoál liña frente  sira hanesan membru PNTL sira, tanba durante ne'e husik hela sira-nia feen, oan no família hodi ba iha fronteira hodi halo serbisu, tanbasá mak Governu la hanoin ida-ne’e.

Deputadu Bankada FRETILIN, Alexandrino da Cruz Cardoso, kestiona servisu Governu tanba durante resesu, nia sempre rona informasaun barak husi ekipa liña frente sira kompostu husi PNTL, F-FDTL, no pesoál saúde sira inklui liña frente sira seluk katak, to’o ohin loron seidauk hetan direitu ba subsídiu frontline nian.

"Osan ita aprova tiha ona, Prezidente Repúblika promulga tiha ona, Governu serbisu halo nusá mak ema-nia direitu ne’e fulan-hitu no ualu ona seidauk simu ne’e”, hatete nia.

Deputada Bankada FRETILIN, Helena Martins Belo, ejize aselera ona pagamentu osan ba servisu liña frente, nune’e sira hala’o serbisu ho di’ak iha terrenu.

“Governu tenke aselera ona pagamentu ba liña frente sira tanba, nu’udar reprezentante povu, kada loron ita simu hela de’it telefone”, hatete nia. (*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items