"Hanesan ohin (18/09), sira halo konferénsia nune'e ejizénsia estatutu partidu nian, tanba partidu sira ne'ebé konkore ih Eleisaun ne'e nia tenke halo kongressu nasionál. Tanba ne'e mak, husi orgaun asosiadu, ida mak FOKD ne'e, sira komesa halo ona konferénsia tanba fulan oin e tinan oin, PLP sei halo kongressu nasionál", dehan Visé Prezidente Konsellu Polítika Nasionál-Partidu Libertasaun Popular (PLP), Francisco de Vasconselho, iha sede partidu PLP, Metiaut, sábadu (18/09).
Dadauk ne’e, PLP iha asosiasaun ualu, ne’ebé asosiasaun hirak ne'e sei kumpre regra no estatutu internal ne’ebé partidu iha hodi regula sira.
To'o oras ne'e, PLP rasik seidauk deklara kongressu, maibé tuir prosedimentu partidu nian, wainhira orgaun asosiadu sira ne'ebé mak hakarak partisipa iha Kongressu Nasionál, sira mós tenke halo resestruturasaun (troka estrutura).
Tanba ne'e, prosesu reestruturasaun ne'e depende liuhusi forma ne’ebé sira uza, bele hala'o liuhusi konferénsia nasionál, no inkontru alargada.
"Depende forma ne’ebé ke sira uza, maibé tenke iha estrutura definitivu, ou meus ne’ebé ke hetan lejitimidade mai husi ninia delegadu sira", dehan nia.
Enkuantu asosiasaun faluk oan-ki'ak no defisiensia nu’udar organizasaun ida ne’ebé halibur ema barak iha laran, no organizasaun ne'e uluk hari’i husi Forsa Armada Libertasaun Nasional Timor-Leste (FALINTIL).
Maibé membru husi asosiasaun ida ne'e barak mak deside hili dalan seluk, balun ba partidu PLP, FRETILIN no CNRT.
Enkuantu iha tinan 2012, membru asosiasaun FOKD fó ona kontribuisaun hodi apoiu kandidatura Prezidente Repúblika.
Kronolozia ka (background) husi Organizasun ida ne'e katak ema sira ne’ebé nia família sira mate, husik hela nia oan ki’ak, hanesan sira ne'e mak halai hamutuk iha ne'e, hamutuk ho pesoál sira ne’ebé dedika-an ba partidu, hodi simu nosaun ho hanoin ida atu kontribui dezenvolvimentu iha nasaun ne'e.
"Tanba ne'e mak sira hamosu orgaun asosiadu ida naran, FOKD (Faluk Oan Ki'ak no Defisiénsia)", esplika nia.
Koordenadór Nasionál Asosiasaun Faluk Oan Ki'ak no Defisiénsia (FOKD), Paulo Correia hatete, preparasaun kona-ba konferénsia nasionál daruak ida ne'e, tuir loloos hala'o iha loron 28 fulan-agostu 2021, maibé la konsege tanba kumpre hela regra Konfinamentu Jerál.
"Ami husi asosiasaun, ami halo konferénsia, ami hili ami-nia estrutura foun ba periodu tinan 2021 to'o 2024", dehan nia.
Asosiasaun Faluk Oan-Ki'ak no Defisiensia iha ninia Porgrama no planu iha futuru oinsá mak bele fó apoiu ba faluk no oan ki’ak sira, inkui ema ho defisiensia.
"Tanba ne'e ita atu haree ba partidu, ami haree ba faluk oan ki’ak ne'ebé mak mate ba rejisténsia, ukun-an ida ne'e mak prioridade sira tenke iha diretu atu goja mós valiberdade ida ne'e, liliu ba sira-nia oan, inan aman faluk, so’e hela oan, presiza Estadu no Governu ida ne'e tau matan", dehan nia. (*)