Tempotimor (Manokwari) – Demonstrasaun no asaun brutu iha Manokwari, kapitál Papua Osidentál daet ona to'o sidade Sorong. Asaun masa ne'ebé brutu, harahun fasilidade públiku, inklui mós fasilidade iha Aeroportu Domine Eduard Osok (DEO) iha Sorong.
Tuir reportajen CNNIndonesia.com iha Sorong, asaun brutu ne'e hahú iha tuku 12.00 meudia. Asaun ne'e hahú bainhira masa ne'ebé tuir demonstrasaun dame, halo protesta insidente ne'ebé akontese iha fim de semana liubá ne'ebé polísia hale’u no asaltu dormitoriu husi estudante Papuaoan sira iha Surabaya no Malang.
"Husi demonstrasaun ne'e, masa balun ne'ebé halibur iha fatin seluk hala'o ona asaun brutu,” hatete fontes CNNIndonesia.com ne'ebé lakohi temi nia naran, Segunda (19/08/19).
Asaun brutu ne'ebé masa halo iha Aeroportu DEO akontese iha tuku 15.00 lokraik. Masa ne'ebé la kontrola, tuda rahun vidru iha área parte laran Aeroportu DEO nian. Iha área karreta para fatin, iha aeroportu refere, masa estragus karreta no motor hirak ne'ebé para hela iha área ne'e.
"Motor hetan estraga. Balun hetan sunu. Atividade iha aeroportu refere para total,” esplika fontes ne'e.
Entretantu, Portavoz Polísia Indonézia nian, Brigadiru Jenerál Dedi Prasetyo reklama katak situasaun iha Sorong kontroladu. “Iha Sorong, maski sei iha konsentrasaun ema, mas kontroladu,” Dedi hatete ba CNNIndonesia.com.
Kona-ba asaun brutu iha Aeroportu DEO, Dedi rekoñese seidauk hetan informasaun. Maski nune'e, nia parte hakaas an para bele hetan informasaun husi autoridade Polísia Papua Osidental nian.
"Seidauk. Ha'u sei halo konfirmasaun ba Papua Osidentál,” Dedi hatete.